Medicina veterinari[1] es le application de principios medical re prophylaxe (o prophylaxis), diagnostica e therapeutica in animales. Primarimente concernente animales domestic, como animales pro production e animales pro compania o sport, ma anque animales in parcos zoologic e animales salvage. Multo importante cargas es anque le supervison public del protection de animales e controlo de viveres.
Medicina veterinari es in le fundo tanto vetule como le domestication del animales ma durante le ultime annos medicina veterinari ha developate multo rapidemente gratias a methodos diagnostic e therapeutic avantiate pro le plus species. Medicina veterinari garanti le qualitate, quantitate e securitate de viveres per controlo del sanitate de bestiales, animales particular e productos intendite como viveres.
Anque animales pro compania hodie sovente recipe cura medical avantiate, p.ex. in canes excambio del articulation coxal, chirurgia de cataracta del oculo, intallation de pacemaker e radiotherapia de tumores in. Le extension de iste curas principalmente depende de tanto moneta le possessor del animal desira expender. A vices il habera conflictos ethic re tanto on debe exponer animales a curas penose. Concernente cavallos e specialmente vaccas e altere animales pro production de viveres le aspectos economic es de grande importantia. Pro un cavallo, que pote vale multe milles euros, il vale expender plus moneta que pro un vacca ordinari. In plure paises medicina veterinari equin es multo specialisate. Labor clinical con cavallos comprende primarimente problemas locomotoric e orthopedic ma etiam maladias in le tracto digestive, como colica equin que es un importante causa de morte in cavallos domesticate. Infectiones e altere maladias del tracto respiratori anque exige multe labor in iste animal.
Scientistas veterinari da contributiones importante in i.a. recercas chemical, virologic, immunologic e pharmacological.
Education in medicina veterinari
Multe universitates examina veterinarios e in general illes anque pote doctorar se. In le plus paises le veterinarios es registrate e supervisate per autoritates statal. Le duration del inseniamento generalmente es 4-7 annos e include tal disciplinas como anatomia, biochimia, pharmacologia, physiologia, pathologia, parasitologia, microbiologia etc. Naturalmente practic labor clinic es importante, specialmente le ultime tempore.
