Un guerra o bello[1] es un lucta armate inter duo o plus de populos o nationes. Si gruppos ethnic o religiose intra un singule nation face un lucta armate le unes contra le alteres, on parla de un guerra civil. On parla de un guerra mundial si paises in tote le mundo es involvite in un guerra.
Le adjectivo correspondente es bellic. Facer le guerra se appella belligerentia, e paises faciente le guerra es paises belligerente.
Le opposito de guerra es pace, un condition in que populos e nationes respecta lor existentia mutue o mesmo lo apprecia. Inter guerra e pace es concipibile diverse formas intermediari, como armistitio e Guerra Frigide.
Definition
Le concepto guerra non ha alcun definition generalmente acceptate. Singer & Small[2] e Deutsch & Senghaas[3] proponeva parlar de "guerra" si le conflicto corresponde al sequente tres criterios:
- Grandor
- Le conflicto resulta in al minus 1.000 mortos in le campo de battalia (non includente le victimas indirecte a causa de fame, de manco de tecto e de maladias.)
- Preparation
- Le conflicto ha essite preparate anteriormente, e/o es gerite per grande organisationes social per medio de recrutamento, training e position de truppas, e per le acquisition, immagazinage e distribution de armas e de munition.
- Legitimation
- Le conflicto es legitimate per un organisation governamental, assi que le assassination massive non sia reguardate como crimine ma como deber.
Regulation
Le belligerentia ha ab le initio essite subjecte a leges e regulationes, ben que illos ha cambiate in le curso del tempore. On ha specialmente considerate le justification de un guerra. Post 1945 le derecto international proscribe le guerra como medio juste pro solver conflictos, si non tote le medios diplomatic ha anteriormente essite exhaurite.
In despecto de tote le legislation international se concilia cata die multe conflictos con armas, sin exhaustion anterior de tote le medios diplomatic. Pro eluder le definition como guerra, le partitos de un tal conflicto usa sovente le euphemismo 'conflicto armate'.
Vide etiam
Referentias
- ↑
Derivationes:
(la) Bellum -
(de) Krieg |
(en) War |
(pt) Guerra |
(es) Guerra |
(ca) Guerra |
(fr) Guerre |
(it) Guerra |
(ro) Război |
(ru) Война
- ↑ Singer, J. David & Melvin Small (1972): The Wages of War, 1816-1965: A Statistical Handbook. New York: John Wiley and Sons.
- ↑ Deutsch, K.W. & D. Senghaas (1973): The steps to war: A survey of system levels, decision stages, and research results. In: Sage Internat. Yearbook Foreign Policy Studies, Vol. 1, pp. 275-329.
