A serra de Lourenzá é unha cadea montañosa que forma parte parte das serras setentrionais de Galiza e que se estende en dirección SW-NE polos concellos da Pastoriza e Mondoñedo.
Empezando desde o interior, está delimitada ao oeste polo rego do Batán e no sur polo último treito deste, entre o punto onde recibe as augas do rego da Lagoa e a súa desembocadura no río de Úbeda, preto do lugar de Casal de Madre, parroquia de Úbeda, na Pastoriza.
A partir de aí discorre ata as súas dúas principais prominencias: A Revolta (785 m) e o Alto de Pradovello (751 m), na parroquia de Cadavedo.
O rebaixe que segue ao Alto do Fiouco en dirección á costa é aproveitado pola autovía do Cantábrico (A-8), para pasar da vertente occidental da serra á oriental, coincidindo co linde entre A Pastoriza e Mondoñedo. Neste segundo treito da serra sobresae o monte da Farrapa (748 m); o límite oeste pono o rego de Valiñadares, mentres que a aba oriental deita as augas dos regos dos Casteláns, de Coto Redondo, da Fraga, de Curros, de Lobrero, do Caxigo, das Penelas e de Ribón.
As principais alturas nesta parte son o monte da Arca (426 m) e Padornelo (605), e a autovía do Cantábrico pasa entrambas.
Malia o seu nome, a serra non chega a internarse no actual municipio de Lourenzá. Tan só os devanditos regatos que baixan cara ao leste na súa parte máis setentrional aflúen no curso alto do río dos Vaos, que, xunto co río do Batán, regan o val de Lourenzá.
O decorrer paralelo á serra da autovía A-8 en cotas elevadas fai deste un tramo problemático da estrada, frecuentemente cortado por mor da brétema (efecto Föhn), o que obriga aos vehículos a circular a un máximo de 100 km/h, mesmo os días con boa visibilidade. A razón está en que ese paso entre montañas ao longo do cordal fai do vento un elemento de risco para a circulación, mais do que tamén se tira proveito para a obtención de enerxía eólica, xa que a serra está inzada de aeroxeradores.
Na ladeira oeste da serra, na parroquia mindoniense de Argomoso, atópanse a cova do Rei Cintolo e o salto do Coro.
Véxase tamén
Bibliografía
