Estadio Old Trafford de Manchester, escenario da final da Liga de Campións da UEFA 2002-03.
A Liga de Campións da UEFA 2002-03 foi a edición número 48 na historia desta competición. Disputouse entre xullo de 2002 e maio de 2003, coa participación inicial de 72 equipos, representantes de 48 federacións nacionais diferentes.
A primeira fase de grupos da competición deu comezo en setembro de 2002, con 32 equipos, e a segunda fase de grupos comezou en decembro de 2002 con 16 equipos. O campión final do torneo foi o AC Milán, despois de derrotar nos penaltis ó Juventus FC na final, disputada o 28 de maio no Estadio Old Trafford de Manchester, logo de empatar sen goles no tempo regulamentado. Para os rossonero supuxo a súa sexta conquista da máxima competición europea.
O partido final disputouse o 28 de maio de 2003, no Estadio Old Trafford de Manchester. Os dous equipos que a disputaron, Juventus FC e AC Milán, eran dous dos grandes dominadores das competicións europeas ao longo da súa historia. Ámbolos dous eran os equipos máis laureados de Italia, e tiñan 2 e 5 Copas de Europa respectivamente, antes da disputa do encontro. Esta era a primeira ocasión na que se disputaba unha final da Liga de Campións completamente italiana. Do mesmo xeito, esta foi a primeira vez que a final da máxima competición continental tivo lugar no histórico estadio Old Trafford. O AC Milán viña de ser campión de Europa por última vez na tempada 1993-94, mentres que o Juventus FC non sabía o que era iso dende a tempada 1995-96.
O encontro rematou co empate a cero inicial, e na prórroga tampoco houbo goles. Os equipos de Carlo Ancelotti e Marcelo Lippi tiveron que ir ós lanzamentos dende o punto de penalti. A Juventus FC fallou 3 lanzamentos da man de Trezeguet, Zalayeta e Montero, mentres que o AC Milán só fallou 2, lanzados por Seedorf e Kaladze. Deste xeito, foi o equipo rossonero o que se levou a final europea entre equipos italianos.
Era a sexta vez que o AC Milán gañaba o título de campión de Europa.
