Billete de 10.000 dólares estadounidenses

Probas de anverso e reverso do primeiro billete de 10.000 dólares (1878).

O billete de 10.000 dólares estadounidenses foi un billete con ese valor facial emitido nos Estados Unidos entre 1878 e 1969. Trátase do billete estadounidense co valor nominal máis ato destinado á circulación ordinaria. Aínda que estes billetes seguen a ser de curso legal, polo que poden ser cambiados polo seu valor en calquera banco, son moi apreciados polos coleccionistas numismáticos e no mercado do coleccionismo alcanzan prezos moi superiores.[1]

Malia ser o billete de maior facial dos de uso ordinario, existiu un aínda maior, o de 100.000 dólares, que se utilizou unicamente para transferencias interbancarias,[2][3] e cuxa posesión por particulares é ilegal.[4]

Historia

Artigo principal: Billetes do dólar estadounidense.

O billete de 10.000 dólares apareceu por primeira vez na serie papel moeda de curso legal de 1878. Emitiuse novamente nas series de 1914 e de 1918, e logo nas de 1928 e 1934.[1] Inicialmente emitiuse en papel moeda de gran tamaño, coñecido domo Horse Blanket, cunhas medidas de 187 mm por 81 mm, e a partir da serie de 1928 reduciuse o seu tamaño a 156 mm por 66 mm.[5][6]

Benny Binion e a súa filla diante do expositor con 100 billetes de 10.000 dólares (ca. 1969).

Orixinalmente emitiuse como un certificado de ouro, mais a Orde executiva 6102 de 1933 limitou a propiedade de moeda de ouro, polo que o billete se redeseñou e volveu emitirse como un billete da Reserva Federal.[1] A Oficina de Gravado e Impresión dos Estados Unidos continuou emitindo os billetes ata 1969, aínda que estes non circularon moito entre a poboación, porque a súa finalidade principal foi a de facilitar as transaccións entre bancos. O 14 de xullo de 1969, o Departamento do Tesouro anunciou que se deixarían de emitir todos os billetes con valores faciais superiores a 100 dólares, e que todos os bancos debían enviar ao Tesouro todos os billetes de 10.000 dólares para a súa destrución, o que provocou que atopar un exemplar fose cada vez máis difícil.[7][8]

Coleccionismo

Esta escaseza levou a que no ámbito do coleccionismo chegasen a pagarse máis de 200.000 dólares por espécimes particularmente escasos e en graos de conservación excelentes.[9]

O empresario de casinos Benny Binion exhibiu un centenar de billetes de 10.000 dólares no seu casino, Binion's Gambling Hall and Hotel. A familia Binion vendeunos en 2016 por cantidades entre 112.500 e 188.000 dólares cada exemplar.[10]

En 2023, un billete de 10.000 dólares de 1934 sen mostras de circulación e certificado pola compañía Paper Money Guarantee (PMG) superou o medio millón de dólares nunha poxa numismática da compañía Heritage Auctions en Texas.[11]

Galería

Notas

  1. ↑ 1,0 1,1 1,2 Gilkes, P. (2016). "When the United States printed $100,000 notes". En Coin World. 15 de xullo.
  2. ↑ Walrath-Holdridge, M. (2023). "Talk about inflation: a $10,000 Great Depression-era bill just sold for $480,000". En USA Today Money. 21 de setembro.
  3. ↑ "$10,000 Bill". Museum of American Finance (www.moaf.org).
  4. ↑ "$100,000 Gold Certificate". The Bureau of Engraving and Printing (www.BEP.gov).
  5. ↑ "All Kinds Of U.S Large-Size Paper Money - Large Bills Currency". CollectiblesCurrency.com
  6. ↑ Miller, Z. (2028). "How the dollar has changed over the years". BusinessInsider.com. 17 de outubro.
  7. ↑ "Historical Currency". The Bureau of Engraving and Printing (www.BEP.gov).
  8. ↑ "Federal Reserve Notes". Board of Governors of the Federal Reserve System (Federalreserve.gov).
  9. ↑ "PMG-graded High-Dollar Notes in the Spotlight at January Heritage Sale". Paper Money Guaranty (PGMnotes.com).
  10. ↑ Brean, H. (2016). "Someone wants to spend $188,000 for $10,000 cash". En Las Vegas Review-Journal. 7 de xaneiro.
  11. ↑ Czachor, E. M. (2023). "$10,000 bill sells for nearly half a million dollars at Texas auction — and 1899 coin sells for almost as much". En CBS News. 27 de setembro.
  12. ↑ "10 000 Dollars Gold Certificate (1928)". Numista.com
  13. ↑ "10 000 Dollars Gold Certificate (1934)". Numista.com

Véxase tamén

Bibliografía

Outros artigos

Ligazóns externas