Agustín Fernández Albor, nado en Santiago de Compostela o 27 de outubro de 1929 e finado na mesma vila o 6 de outubro de 1987,[1] foi un xurista e catedrático galego, especialista en dereito penal.
Traxectoria
Cursou a Licenciatura de Dereito na Universidade de Santiago de Compostela e no curso académico 1957/58 foi nomeado profesor axudante de Dereito Penal nesta Universidade.
En 1960 obtivo o título de Doutor pola USC coa cualificación de sobresaínte cum laude pola defensa da súa tese Contribución al estudio de la diferenciación dogmático entre homicidio y asesinato que despois sería premio extraordinario.
No ano 1961, mediante concurso oposición acadou a categoría de profesor adxunto de Dereito Penal, en 1963 profesor agregado de Cátedra e en 1968 Profesor Agregado provisional. En 1969 obtivo a praza de profesor agregado de Dereito Penal e finalmente en 1971 acadou a praza de catedrático de Dereito Penal pola Universidade de Santiago.
Nesta Universidade foi Secretario de Publicacións, Intercambio Científico e Extensión Universitaria, Secretario da Facultade de Dereito de Santiago de Compostela, Vicedecano da Facultade, Vicerreitor da Universidade durante 6 anos e Director do Departamento de Dereito Penal e do Instituto de Criminoloxía.
Realizou viaxes de estudos por Bélxica, Francia e Portugal en 1958, antiga Iugoslavia, Francia, Austria e Italia onde ampliou estudos con Prof, C. Pedrazzi no ano 1963, cursou estudos co Prof M. Ancel en París e diplomouse en Dereito Comparado en Estrasburgo.
Foi membro da Asociación Internacional de Dereito Comparado, da Comisión nacional española para a redacción do Código Penal tipo para Latino América e da Asociación Internacional de Dereito Penal.
Académico de número da Academia Galega de Xurisprudencia e Lexislación e membro do Instituto de Ciencias Criminolóxicas da Universidade Complutense de Madrid.
Cabe destacar a súa obra Homicido y asesinato e os seus traballos sobre a delincuencia xuvenil, sobre a problemática do consumo e tráfico de drogas e sobre a delincuencia económica nas súas formas tradicionais e nas máis complexas e sofisticadas.
Vida persoal
Foi irmán do médico e político Xerardo Fernández Albor.
Obras
- Homicido y asesinato (1964)
- Normativismo e institucionalismo en derecho penal (1965)
- Aportación al estudio comparado de los sistemas penales europeos (1966)
- Circa il cossidetto “delitto d’onore” (1966)
- El daño moral en los delitos contra el honor (1967)
- El agio arrendaticio (1969)
- Delincuencia juvenil (1973)
- Estudios sobre criminalidad económica (1978)
- Delincuencia y economía (1983)
Recoñecementos
- Medalla de las Ciencias Penales y Criminológicas del Instituto de Criminología de la Universidad Complutense de Madrid en 1981.
- Insignia de Ouro da Universidade de Santiago en 1984.
Notas
Véxase tamén
Ligazóns externas
