De Freulepartij 2006 is op woansdei 9 augustus ferkeatst. Op de list stiene 51 partoer. It wie de 102de edysje fan de wichtichste jongeskeatspartij fan it jier. Der soene neffens saakkundigen sa'n 7 of 8 partoeren kânshawwer foar de oerwinning wêze. De generale foar de Freulepartij wie wûn troch Easterlittens, mar dat partoer mei as motor Feiko Broersma, sneuvele al yn de 1e omloop, wêrnei it partoer fan Hijum/Feinsum mei Martijn Olijnsma as sterke man it paad frij like te hawwen. It degelik keatsende Dronryp sette harren lykwols yn de heale finale de foet dwers, dêrby holpen troch Martijn dy't twa kear op seis gelyk in opslachmisser hie. De oare finalist wie Goaiïngea dat yn de heale finale Grou nei it tredde plak ferwiisde. Yn de finale koe Goaiïngea noch oant 2-2 by bliuwe, mar dêrnei pakte Dronryp, mei Johan Diertens as foar bêst opslagger en efterynse yn de haadrol, troch: 5-5 (6-2). It wie foar Dronryp de 4e winst fan dizze klassike keatspartij.

5e priis: Berltsum (Jelle Harm Kooistra, Hilbrand Stoffers en Frederik van der Meij), Easterein (Jelte Pieter Dijkstra, Ewout de Boer en Sietse Kooistra) en Boalsert (Peter Nieuwenhuis, Arjan Breeuwsma en Thomas van Zuiden); 3e priis: Hijum/Feinsum (Martijn Olijnsma, Helmer Hofman en Gerrit Steegstra) en Grou (Jorrit de Groot, Niels Heitbrink en Jan Brandt Wiersma); 2e priis: Goaiïngea (Thomas Sijbesma, Sibe Wijbrandi en Sietse Kuipers); 1e priis: Dronryp (Sjoerd van der Meer, Rutger Diertens en Johan Diertens).