Thermoplasma arkeoen genero bat da, Thermoplasmataceae familiakoa. Mikrobio estremofiloa da, termofiloa eta azidofiloa. Bere tenperaturarik onena hazteko 55º C-koa da, eta pH oso azidoetan bizi da (pHrik gogokoena = 2), meatzeetako ingurugiro azidoetan, esaterako.

Anaerobio fakultatiboa da, eta sufrea erabiltzen du elektroien azken hartzaile gisa. Kimiorganotrofoa da ^[1].

Bi dira genero honetan sailkatzen diren espezieak: Thermoplasma acidophilum eta Thermoplasma volcanicum. Mikrobio azidofiloenen artean daude biak. Mugikorrak dira, flageloak baitituzte.

Thermoplasmaren ezaugarri deigarrienetako bat da zelula hormaren gabezia. Hau ez da ohikoa bakterio eta arkeobakterioetan. Zelula hormarik gabe, estres osmotikoa gainditzeko eta pH baxuak eta tenperatura altuak jasateko zelula mintza oso berezia du Thermoplasmak: manosa eta glukosa unitateak dituen tetraeter lipidiko batez osatua ^[2].

Habitati dagokionez, T. acidophilum ikatzeko meategi azido beroetan, sulfuroetan aberatsak direnetan, hazten da. T. volcanicum, aldiz, iturri termal azido eta sulfurosoetan bizi da.

Mikrobio estremofiloa izanik, Thermoplasma eta bera bezalako beste Archaea batzuek zientzialari eta astrobiologoen arreta erakarri dute azken urteotan: muturreko ingurugiroetan, unibertsoko beste planeta batzuetan egon daitezkeenetan, bizia posible dela frogatzen baitute. Era berean, biziaren jatorriari buruzko ikerketetan informazio ugari eman dezake Thermoplasmak, antzinako Lur planetan zeuden muturreko baldintzetan arkeo hau, edo oso antzekoren bat, bizi bait zitezkeen.