María Bru Aguirre (Valentzia, 1885eko irailaren 1a – Madril, 1966ko apirilaren 8a) valentziar aktorea izan zen.[1][2][3][4]
Bizitza
Valentzian jaio zen, Enrique Bru, Probintziako Ospitaleko zuzendariaren eta Ana Aguirre Matiolen alaba izan zen. Loretoko Andre Mariaren ikastetxean ikasi zuen. Han, eskolako eta ikasturte-amaierako jaiak zirela eta, poesia komikoak errezitatzen zituen.[5]
Aktore ibilbidea
Madrilen hasi zen lanean, Komediaren Antzokian eta Espainiako Antzokian, 1920ko hamarkadan Margarita Xirgúren konpainiara joan arte.
Antzerkia
Bere ibilbide artistikoa eszenatokiei lotua egon zen batez ere, eta bereziki komediaren generoarekin (adibidez, Carlos Arnichesen El señor Badanas, edo Enrique Jardiel Poncelaren Angelina o el honor de un brigadier), nahiz eta dramak ere antzeztu zituen, horietako batzuk Jacinto Benaventerenak. Parte hartu zuen lanen artean honako hauek aipa daitezke: Todo para ti, La noche del sábado, Rosas de verano, El mal que nos hacen edo Un buen rato en el music-hall.
Zinema
Protagonista paperak egin ez arren, hogei bat filmetan parte hartu zuen.[5] 1931n, Florián Reyren La pura verdad filmarekin egin zuen debuta, eta bereziki aktibo egon zen 1940ko hamarkadan pantaila handian, besteak beste, Morena Clara (1936), Imperio Argentinarekin, Ladislao Vajdaren Doce lunas de miel (1944), Edgar Le Nevilen La vida en un hilo (1945) eta Jaime Mayoraren El Sótano (1949).
Bere lan nabarmenenak hauexek izan ziren: Francisco Gargalloren Eran tres hermanas eta El sobre lacrado; Max Neufelden Madrid de mis sueños; Manuel Blayren Deber de esposa; Florián Reyren Ídolos eta Orosia; Ladislao Vajdaren Doce lunas de miel, Te quiero para mí, El testamento del virrey eta Ronda española; Jerónimo Mihuraren Aventura, El camino de Babel eta Me quiero casar contigo; Juan de Orduñaren Mi enemigo el doctor; Edgar Nevilleren La vida en un hilo; Pedro Otzoupen Cero en conducta; José Díaz Moralesen La Revoltosa; Jaime de Mayoraren El sótano edo Julio Salvadorren Duda, besteak beste.[5]
Bizitza pribatua
Pedro González aktorearekin ezkonduta egon zen.
1966ko apirilaren 8an Madrilen hil zen.[2][1]
Erreferentziak
Kanpo estekak
