La Maŭritania Fervojo estas la nacia fervojo de Maŭritanio. Ĝi konsistas el unu, 704 km longa fervoja linio, ligante ferercan minejan centron de Zuerato kun la haveno de Nuadibu, tra Fderik kaj Ŝum. La fervojan linion kontrolas la ŝtata organizo Société Nationale Industrielle et Minière (SNIM).
La trajno de la fervojo povas longi eĉ ĝis 2,5 km, tiel ĝi estas unu el la plej longaj kaj pezaj de la mondo. Ĝi konsistas el 3 aŭ 4 dizel-elektraj lokomotivoj de General Motors (3.300 ĈP) kaj 200 ĝis 210 vagonoj, kiuj transportas po ĝis 84 tunoj da fererco kaj kelkajn priservajn vagonojn.
Vojaĝantoj povas uzi la trajnon nur kelkfoje, en organizo de Societo ATTM (Société d'assainissement, de travaux, de transport et de maintenance). La pasaĝeraj vagonoj estas kelkfoje aldonitaj, sed pli ofte la pasaĝeroj simple veturas sur la ferercaj vagonoj.
