Los amantes pasajeros (La pasemaj geamantoj) estas la titolo de hispana filmo verkita kaj reĝisorita de Pedro Almodóvar kaj premierita en Hispanio en 2013. Ĉefaj geaktoroj estis Javier Cámara, Raúl Arévalo, Lola Dueñas kaj Hugo Silva inter pluraj aliaj.
La filmo ricevis diversajn nomumojn kaj premiojn.
Intrigo
Averto: La teksto, kiu sekvas, malkaŝas detalojn pri la intrigo de la rakonto.
Dum flugo de Madrido al Meksikurbo per Airbus A340 de la flugentrepreno Península, aperis grava problemo, pro kiu la pasaĝeroj, vidante sin rande de la morto, iom post iom malfermas siajn plej intimajn sekretojn.
Kelkaj de la pasaĝeroj estas aparta triopo de stevardoj, nome Fajas (Carlos Areces), Joserra (Javier Cámara) kaj Ulloa (Raúl Arévalo); viziulino nome Bruna (Lola Dueñas), kiu estas ankoraŭ virgulino ĉar ŝi timigas la virojn; kunpiloto Benito Morón (Hugo Silva); ĉefpiloto Álex Acero (Antonio de la Torre), feliĉa familipatro, kun alkoholisma koramiko; sinjoro Más (José Luis Torrijo), korupta entreprenisto kiu fuĝas el Hispanio; Infante (José María Yazpik), de kiu oni scias malmulte, nur ke li legas la romanon "2666" de Roberto Bolaño; Norma Boss (Cecilia Roth), eraro kiu fariĝis virino; Ricardo Galán (Guillermo Toledo), malsukcesa aktoro; du ĵusgeedzoj irantaj al Cancún por mielmonato (Miguel Ángel Silvestre kaj Laya Martí).
Aliaj roluloj de la filmo (ekster la aviadilo) estas Ruth (Blanca Suárez); Alba (Paz Vega); León (Antonio Banderas), laboristo kiu faras eraron kiu riskos la vivon de la pasaĝeroj; Jessica (Penélope Cruz), kiu zorgas pri la transportado de la valizoj; la pordistino de la konstruaĵo en kiu loĝas Alba (Carmen Machi).
Averto: Malkaŝado de la intrigo de la rakonto ĉi tie finiĝas.
Geaktoraro kaj roluloj
Analizo
La kritiko ĝenerale estis malfavora. Por ekzemplo, la populara retejo "Rotten Tomatoes" kvalifikis la filmon per totala averaĝo de 49 % de pozitivaj voĉoj. Tamen, ĝi komerce sukcesis: enspezis ĉirkaŭ 14,6 milionojn da eŭroj.
Referencoj
Eksteraj ligiloj
- En tiu ĉi artikolo estas uzita traduko de teksto el la artikolo Los amantes pasajeros en la hispana Vikipedio.
