John Roberts
Ganwyd	11 Medi 1946  Abercynon
Bu farw	4 Ionawr 2016  Sydenham
Dinasyddiaeth	y Deyrnas Unedig
Galwedigaeth	pêl-droediwr, gwerthwr, driving instructor, rheolwr pêl-droed
Taldra	190 centimetr
Pwysau	85 cilogram
Chwaraeon
Tîm/au	Birmingham City F.C., Arsenal F.C., Hull City A.F.C., Northampton Town F.C., Oswestry Town F.C., C.P.D. Wrecsam, C.P.D. Dinas Abertawe, Tîm pêl-droed cenedlaethol Cymru, Tîm pêl-droed cenedlaethol Cymru dan 21 oed, C.P.D. Y Seintiau Newydd
Safle	centre-back
Gwlad chwaraeon	Cymru

Cyn chwaraewr pêl-droed rhyngwladol Cymru a Wrecsam oedd John Griffith Roberts (11 Medi 1946 – 4 Ionawr 2016). Fe'i ganed yn Abercynon, Rhondda Cynon Taf^[1] a llwyddodd i ennill 22 cap dros Gymru rhwng 1971 a 1976.

Dechreuodd Roberts ei yrfa fel ymosodwr gydag Abertawe gan ymuno â'r clwb fel amatur cyn troi'n broffesiynol ym 1964. Wedi tair blynedd ar y Vetch, symudodd i Northampton Town am £15,000 yn Nhachwedd 1967. Tra'n chwarae i Northampton symudodd o chwarae fel ymosodwr i chwarae yn yr amdiffyn^[2]. Ym Mai 1969 penderfynodd Arsenal dalu £45,000 amdano a daeth yn aelod allweddol o'r garfan lwyddodd i ennill Cynghrair Lloegr a Chwpan FA Lloegr ym 1970-71^[2].

Yn Hydref 1972 ymunodd Roberts â Birmingham City am £140,000 a chwaraeodd yn rheolaidd am y ddau dymor nesaf cyn i anaf cas ei orfodi absenoldeb hir dymor. Ym 1976, wedi methu a sicrhau ei le yn ôl yn nhîm Birmingham, symudodd i Wrecsam am £30,000 er mwyn cymryd lle Eddie May oedd wedi gadael am Abertawe. Roedd yn aelod allweddol o garfan Wrecsam lwyddodd i sicrhau dyrchafiad i'r Ail Adran a chodi Cwpan Cymru ym 1977-78.

Gadawodd Wrecsam ym 1980 gan ymuno â Hull City am £15,000 ond daeth ei yrfa i ben oherwydd anaf ym Mehefin 1982^[2].

Gwnaeth Roberts ei ymddangosiad cyntaf dros Gymru yn erbyn Yr Alban ar Barc Ninian, Caerdydd ym 1971^[3]. Roedd yn aelod o garfan Cymru chwaraeodd yng ngemau rhagbrofol Euro 1976^[4][5] a casglodd yr olaf o'i 22 cap yn erbyn Yr Alban ym 1976^[3].