Дом-музей Элізы Ажэшка

Дом-музей Элізы Ажэшка
Заснаваны 2001
Месцазнаходжанне вуліца Элізы Ажэшка, д.17, г.Гродна Гродзенская вобласць.
Лагатып Вікісховішча Медыяфайлы на Вікісховішчы

Дом-музей Элізы Ажэшка — дом у Гродне, дзе некаторы час жыла і памерла пісьменніца Эліза Ажэшка.

Сучасны адрас: вуліца Ажэшка, 17.

Дом належаў адвакату Станіславу Нагорскаму — другому мужу Э. Ажэшка. У гэтым доме пісьменніца пражыла шаснаццаць гадоў і памерла ў 1910 г.

Доўгі час у доме было абласное аддзяленне Саюзу пісьменнікаў Беларусі. У былой гасцёўні Элізы Ажэшка быў кабінет, дзе працавалі вядомыя празаікі — Васіль Быкаў і Аляксей Карпюк. Музей адкрыўся ў 2001 г.

Пачынаецца знаёмства наведвальнікаў з домам-музеем з працоўнага кабінета знакамітай пісьменніцы. Сапраўдных рэчаў, звязаных з жыццём пісьменніцы, захавалася няшмат. Музей мае арыгінальны фотапартрэт з яе аўтографам, некалькі гербарыяў, зробленых яе рукамі. Таксама захаваўся ў гасцёўні сапраўдны камін, пад якім пісьменніца любіла пасядзець ды паразмаўляць. Рэшта экспанатаў толькі нагадвае тагачасную эпоху — стол, канапка, кніжная шафка.

У астатніх памяшканнях дому размясціўся юнацкі філіял абласной навуковай бібліятэкі імя Я. Карскага і аддзел літаратуры на замежных мовах.

Спасылкі

Ахоўны знак Аб’ект Дзяржаўнага спіса гісторыка-культурных каштоўнасцей Рэспублікі Беларусь, шыфр 412Г000005