Свята-Успенская царква — праваслаўны храм у аграгарадку Чарацянцы Гомельскага раёна. Знаходзіцца на паўднёвай ускраіне вёскі.
Гісторыя
Пабудавана ў 1865—68 гадах з цэглы на сродкі мясцовых жыхароў і дваран Магілёўскай губерні на месцы згарэлага драўлянага храма.
У 1930-я гады з купалоў храма былі скінуты крыжы. Падчас Другой сусветнай вайны будынак быў пашкоджаны стрэлам гарматы. Нягледзячы на гэта, царква заставалася дзеючай, хаця на працягу многіх гадоў не рамантавалася[1].
Прыход быў адноўлены ў 1992 годзе. 10 студзеня 2012 года будынак быў занесены ў Дзяржаўны спіс гісторыка-культурных каштоўнасцей Рэспублікі Беларусь[2].
З 2015 года храм знаходзіўся на рэстаўрацыі, а 15 снежня 2018 года архіепіскап Сцяфан асвяціў прастол царквы.
У 2020 годзе на святара царквы склалі пратакол аб адміністрацыйным правапарушэнні за правядзенне рэстаўрацыі храма, якому нададзены статус гісторыка-культурнай каштоўнасці, без узгаднення з Міністэрствам культуры. У ходзе рэстаўрацыі блакітныя купалы-цыбуліны замянілі на залатыя, фасад перафарбавалі ў жоўты, паставілі пластыкавыя вокны[3].
Па прычыне гэтага адбудзецца пасяджэнне, у ходзе якога спецыялісты паглядзяць, якія парушэнні былі дапушчаны, і калі ў выніку прызнаюць, што царкве трэба вярнуць яе першапачатковы выгляд, перарабляць купалы храм будзе за свой кошт[3].
Архітэктура
Помнік архітэктуры рэтраспектыўна-рускага стылю. Мае традыцыйную 4-часткавую крыжова-купальную кампазіцыю з 3-яруснай 4-граннай званіцай на фасадзе прамавугольнай апсіды з тыльнага боку. Сяродкрыжжа завершана 8-гранным светлавым барабанам пад цыбулепадобным купалам. Сцены расчлянёны арачнымі аконнымі праёмамі з броўкамі, дэкарыраваны рэльефнымі крыжамі, круглымі разеткамі, крапаванымі панэлямі вуглавымі лапаткамі, аркатурнымі фрызамі.
Зноскі
Літаратура
Спасылкі
.jpg)
