Змешаная эстафета (біятлон)

Зме́шаная эстафе́та — каманднае спаборніцтва ў біятлоне. Каманда складаецца з чатырох спартсменаў — прадстаўнікоў адной краіны. Кожны біятланіст праходзіць адзін этап, які складае 6 км для жанчын і юніёраў і 7, 5 км для мужчын і юніёраў[1][2], з двума агнявымі рубяжамі.

Гісторыя

Змешаная эстафета — самы малады від біятлонных спаборніцтваў, які праводзіцца ў рамках Чэмпіянатаў свету і Кубка свету. Упершыню змешаная эстафета была праведзена на пятым этапе Кубка свету сезона 2002/2003 у нямецкім Рупольдынгу, тады спартсмены беглі 4х4,8 км[3]. У рамках Чэмпіянатаў свету змешаная эстафета была ўпершыню праведзена ў 2005 годзе ў Ханты-Мансійску. Першымі чэмпіёнамі і чэмпіёнкамі свету на гэтай дыстанцыі сталі расійскія біятланісты Вольга Пылёва[4], Святлана Ішмуратава, Іван Чэрэзаў і Мікалай Круглоў.

Змешаныя эстафеты таксама праводзяцца на спаборніцтвах (у тым ліку на чэмпіянатах свету з 2008 года) па летнім біятлоне.

6 красавіка 2011 года змешаная эстафета была ўключана ў праграму Алімпійскіх гульняў.

Рэгламент гонкі

Па аднаму прадстаўніку ад кожнай краіны стартуюць адначасова і, прабегшы свой этап, перадаюць эстафету наступнаму біятланісту з сваёй каманды. Спачатку свае дыстанцыі праходзяць жанчыны, затым мужчыны[5]. Першая стральба — лежачы, другая — стоячы. Спартсмен, як і ў звычайнай эстафеце, мае па тры запасных патрона на кожнай стральбе. Калі біятланіст патраціць запасныя патроны, то за кожны наступны промах прадугледжана праходжанне штрафнога круга, роўнага 150 м.

Зноскі

  1. ↑ На чэмпіянатах свету 2005 і 2006 гадоў эстафетныя этапы змешанай эстафеты і для мужчын, і для жанчын складалі 6 км, а на першай змешанай эстафеце ў рамках Кубка свету (у сезоне 2002/2003) — 4,8 км.
  2. ↑ Сярод юнакоў і дзяўчат змешаная эстафета пакуль не праводзіцца.
  3. ↑ Вынікі першай у Кубке свету змешанай эстафеты.
  4. ↑ Вольга Пылёва з сезона 2008/2009 і да завяршэння сваёй кар’еры ў сезоне 2009/2010 выступала пад прозвішчам свайго мужа — Валерыя Мядзведцава.
  5. ↑ На першай змешанай эстафеце ў рамках Кубка свету (у сезоне 2002/2003) і на Чэмпіянаце свету 2006 года першы і трэці этапы праходзілі жанчыны, другі і чацвёрты — мужчыны.