PROFILPELAJAR.COM

Zumaia
Alministración
País	España
Autonomía	País Vascu
Provincia	Guipúzcoa
Comarcas	Urola Kosta
Tipu d'entidá	conceyu d'España
Alcalde de Zumaia	Iñaki Castor Aguirrezabalaga Alcorta
Nome oficial	Zumaia (eu)
Códigu postal	20750
Xeografía
Coordenaes	43°17′00″N 2°15′00″W / 43.28333°N 2.25°O
	Zumaia Zumaia (España)
Superficie	11.2 km²
Altitú	20 m
Llenda con	Aizarnazabal, Getaria, Zestoa y Deba
Demografía
Población	10 251 hab. (2024); - 5019 homes (2019); - 5079 muyeres (2019)
Porcentaxe	100% de Urola Kosta
Densidá	915,27 hab/km²
Más información
Fundación	1347
Estaya horaria	UTC+01:00
Llocalidaes hermaniaes	Zug (es)
	zumaia.eus

Zumaia ye un conceyu y villa de la provincia vasca de Guipúzcoa (España).

Xeografía

Allúgase na bocana los ríos Urola y Narrondo. Llenda al norte col Mar Cantábricu, al este col conceyu de Getaria, al oeste con Deba y les llocalidaes d'Itziar y Elorriaga, y al sur colos barrios d'Arroa ya Ibañarrieta, nel conceyu de Zestoa.

El nucleu urbanu de Zumaia abellugose nel so orixe na manzorga de la ría del Urola, ente delles colines que separten la población del Mar Cantábricu. Anguaño, la población espardióse per dambos llaos del estuariu, algamando tamién la vega del ríu Narrondo.

Historia

Anque, como cuasi toles poblaciones europees, l'orixe exautu de la villa de Zumaia ye bastante imprecisu, too apunta a que la población medró de magar del monesteriu de Santa María. Nun cartafueyu de 1292 el rei de Castiella Sanchu IV fai referencia per vez primera d'un llugar nomáu Zumaia.

Anque esti monesteriu nun sabe onde taba asentáu paez que si tenía venceya colo que güei conocemos por Zumaia. L'orixe de la villa xurde cuando los habitantes esparcíos pol valle de Sehatz, fartos de sufrir saqueos, abandonen les sos cases y entamen una villa muriada que-yos valiere pa defendese. De toes menes Zumaia nun ta reconocida como villa hasta 1347, Alfonsu XI aprueba la Carta Puebla de Villa de Villagrana de Zumaia, a la que se-y permitió acoyese al fueru de San Sebastián.

Nel sieglu XVI, tenía menos d'un cientu cases dientru la zona muriada y tres barrios nes proximidaes. Anguaño nun queden restos de la muria que nun diba de siguío porque había zones cubiertes por cases solariegues y torres que valíen igual que la muria pa protexer la villa. Los puertes de la villa destruyéronse na metá del sieglu XVIII.

Pa fines del sieglu XVI empiecen a vese les primeres industries na ría, y la población entama a vivir de la pesca y la navegación, ensin dexar de llau l'agricultura. Estableciéronse llinies de comerciu con Holanda, mercábase con materies primeres de Zumaia y productos manufacturaos holandeses.

Los sieglos XVII y XVIII la situación económica del pueblu fue delicada, siendo la so base'l cultivu de maíz, fabes de mayu y trigu. Ye por eso que l'actividá marítima va medrando adulces y d'esta mena en 1610 fúndase la Cofradía de Mareantes de San Telmo.

La villa entamó a prosperar yá bien entráu'l sieglu XVIII cuando secaron les marismes pa aprobechales pal cultivu, pero la economía nun medraría de verdá fasta'l sieglu XIX cola llegada de les primeres cementeres, con elles lleguen meyores comunicaciones terrestres al construyise la carretera de Getaria nos primeros años 1880, quedando ansí comunicada direutamente con San Sebastián. Lleguen los ferrocarriles Deba-Zarautz (1900) y del Urola, que xunía Zumaia con Zumarraga y inaugurólu'l rei Alfonsu XIII el 22 de febreru de 1926.

Cola entrada del sieglu XX la industria cementera escái en favor de la naval, como anéudota'l primer motor diesel montáu n'España fízose nos talleres de los hermanos Yeregui en Zumaia. Tamién medró enforma la industria'l metal, que sufrió crisis y reconversiones a fines del sieglu XX. De la mesma forma que'l sector turísticu, anque con un pequeñu despegue nos caberos años, nun ye lo que foi nos entamos del sieglu pasáu.

Toponimia

La teoría que paez más válida diz que'l orixe del términu Zumaia bien de la pallabra vasca zuma o zume que significa blima o blimal, planta abundante nes riberes de la zona, l'equivalente tomonímicu asturianu de Zumaia sería Blimea.

Demografía

Evolucíon demográfica

(En 1842 y 1857 incluise los habitantes d'Aizarnazabal enantes de la independencia d'esti conceyu de Zumaia.)

Economía

La industria y los servicios son güei el motor económico de la llocalidá, u s'atopen delles medianes empreses del metal y tresformaciones mecániques, asina como del naval (Astilleros Balenciaga, Motores Guascor). Pesi a que fuera ún de los destinos cimeros de la costa vasca nes primeres décades del sieglu XX, el sector turísticu esaniciose dafechu na decada de 1980. Sólo nos últimos años, y asociáu a un esporpolle urbanísticu importante (xunío a l'apertura d'un puertu deportivu na su bahía), asitiáronse na llocalidá dalgunes instalaciones hoteleres.

Tresportes

Zumaia cuenta con servicios diarios per carretera cola capital guipuzcoana (San Sebastián) y les llocalidaes de Zarautz, Azpeitia, Azkoitia o Zumárraga, ente otres. Na so estación de ferrocarril opera anguaño la compañía Eusko Trenbideak, d'anchu métricu, con servicios ente Bilbao y San Sebastián.

Los aeropuertos más cercanos son el de Hondarribia (San Sebastián), a unos 50 quilómetros, Biarritz (País Vascu francés), a 70, y Sondika (Bilbao), a 90 quilómetros aproximao.

Personaxes ilustres

Juan Martínez de Mendaro (sieglu XV): mariñán y militar que lluchó y venció a una escuadra portuguesa en Xibraltar en 1475.
Baltasar de Echave (1540-1620): pintor.
Juan de Olazábal Bastida (sieglu XVII): secretariu del rei Felipe IV de Castiella y Contador Xeneral de la Inquisición.
José Mari Zubia, conocíu como Aita Mari (1809-1866): mariñán y pescador. Foi un héroe popular nel País Vascu polos salvamentos marítimos que fizo, morriendo na mar nel so caberu salvamentu.
Ángeles Sorazu (1873-1921): monxa y escritora mística.
Bonifacio de Echegaray (1878-1956): escritor.
Julio Beobide (1891-1969): escultor.
José María Korta (1944-2000): empresariu vinculáu al PNV y presidente de la patronal guipuzcoana. Asesináu por ETA.
Jon Maia (1972): cantante y músicu tradicional y escritor.
Lucía Lacarra (1975): bailarina de ballet clásico. Premiu nacional de danza en 2005.
Gotzon Enbil (1977): Xugador de cesta-punta. 5 veces campeón del Mundu por pareyes con Iñaki Goikoetxea.
Oier Aizpurua (1978): piragüista. Campeón del Mundu en delles modalidaes.
Iñaki Goikoetxea (1980): Xugador de cesta-punta. 5 veces campeón del Mundu por pareyes con Gotzon Enbil.

Otres personalidaes vinculaes a Zumaia

Ignacio Zuloaga (1870-1945): Pintor. Pasaba los branos en Zumaia. La so antigua casa (Santiago Etxea), allugada a la vera de la sablera de Santiago, ye anguaño un muséu dedicáu a la so obra. La casa de branu de Zuloaga foi puntu d'alcuentru d'inteleutuales y artistes españoles de la época como José Ortega y Gasset (que tien una cai en Zumaia); Miguel de Unamuno, Pío Baroja, Gregorio Marañón o Ramón María del Valle-Inclán.
Juan Belmonte (1892-1962): Toreru. Foi a torear delles veces a Zumaia de baldre y con fines benéficos a pidimentu del so collaciu'l pintor Zuloaga, y sofitó la construcción del Hospital de San Juan. N'agradecimientu una cai del pueblu lleva'l so nome.
Luis Martínez Kleiser (1883-1971): periodista y escritor madrilán, mui vinculáu a Zumaia. Escribió un ensayu tituláu La villa de Villagrana de Zumaia: Apuntes y pormenores históricos. Tien una calle dedicada en Zumaia.