PROFILPELAJAR.COM

Sega
	SEGA Games Co., Ltd. (en); 株式会社セガゲームス (ja)
	negociu, empresa, desarrollador de videoxuegos y distribuidora de videoxuegos
Llocalización
Sede	Shinagawa (es)
Direición	Xapón
Forma xurídica	Kabushiki gaisha y holding (es)
Historia
Sega 2011 data breach (en) [[File:Noun Project label icon 1116097 cc mirror.svg
Organigrama
Dueñu	Sega Sammy Holdings (es) (2004)
Sector
Industria	industria del videoxuegu
Productos destacaos	software; SG-1000; Master System; Mega Drive; Sega Game Gear; Genesis Nomad; Sega Saturn; Sega Dreamcast; Sonic the Hedgehog (es) ; Phantasy Star (es) ; Virtua Fighter (serie) (es) ; Puyo Puyo (es) ; Shining (es) ; Shenmue (es) ; Yakuza (es) ; The House of the Dead; Valkyria Chronicles (es) ; Super Monkey Ball (es) ; Total War (es) ; Football Manager (es) ; Saga Shinobi (es) ; Company of Heroes; Megami Tensei (es)
Participación empresarial
Organización matriz	SEGA Group Corporation (en)
Filiales	ver Atlus; The Creative Assembly (es) ; Sega-AM2 (es) ; Sonic Team (es) ; Relic Entertainment (es) ; Sega Toys (es) ; Sega of America (es) ; SEGA Europe Ltd (es) ; Sega Wow (es) ; Sega Sports R&D (es) ;
Propietariu de	ver Sega Sports R&D (es) ; Sega Wow (es) ; The Creative Assembly (es) ; Camelot Software Planning (es) ; Sonic Team (es) ; Relic Entertainment (es) ; Sports Interactive (en) ; Sega AM3 (es) ; Overworks (en) ; Wow Entertainment, Inc. (en) ; SegaSoft (es) ; Sega Racing Studio (en) ; Ryu ga Gotoku Studio (en) ; Smilebit (en) ;
Datos económicos
Emplegaos	3238 (30 setiembre 2020)
	Web oficial

Sega Corporation ye una empresa xaponesa que desendolca software y hardware na estaya del entretenimientu (videoxuegos). Ye una de les marques de videoxuegos más respetaes del mundiu. SEGA tuvo una llarga historia d'ésitos mesmo nel mercáu de los arcades como nel de les consoles, pero dende'l llanzamientu de Dreamcast, alcuéntrase fuera'l mercáu'l Hardware, pal que namás se dedica a la programación de videoxuegos y l'aniciu de dalgunos periféricos pa máquines d'otres compañíes. Sicasí, continúa'l desendolcu de hardware pa máquines recreatives. Les oficines centrales de SEGA afáyense en Tokiu, Xapón.

Historia

SEGA ñaz en 1965 del amiestu de les compañíes Service Games y Rosen Enterprises Ltd. De la primera coyeríase'l nome. Esta dedicábase a la venta de Jukebox pa les bases militares norteamericanes, mientres que la segunda yera una empresa d'importación d'arte y otros productos fundada en Xapón por Dave Rosen durante 1953. Rosen llevaba dende 1956 importando xuegos recreativos y llegó a allugar 5.000 d'ellos per too Xapón, pero cada vegada taba más esmolecíu coles máquines trayíes dende Estaos Xuníos, poro, decidió aniciar los sos propios xuegos amestándose con Service Games, d'u xurdió SEGA Enterprises Ltd.

SEGA entamó con Rifleman, un xuegu mecánicu que s'asemeyaba a los tiroteos del alloñáu oeste y pa 1967 yá esportaba xuegos a Estaos Xuníos. El primer ésitu de la compañía foi Periscope (1968), un simulador de somarinos, y el so caberu xuegu mecánicu foi Jet Rocket (1970). Dende ehí, SEGA dedicóse a los xuegos electrónicos y a les recreatives, aniciando de 1967 a 1979 un total de 140 xuegos estremaos. En 1980 SEGA mercó Gremlin Industries, un fabricante de máquines recreatives, ya inxirióse nel mundiu los videoxuegos domésticos llicenciando dellos de los sos xuegos. Daquella Gulf+Western mercó la compañía pero vendióla na crisis del videoxuegu, oportunidá qu'aprovechó Rosen xunto con unos inversores xaponeses pa recuperar el control.

Nos años nos que SEGA tuvo baxo'l control de Gulf & Western's llanzáronse la SG-1000 y el SC-3000, dos sistemas aniciaos cola idea de competir pol mercáu domésticu pero que nun tuvieron relevancia abondo. Nun foi hasta 1984 cuando SEGA fixo un apueste firme cola Mark III p'aportar a toles cases, pero la sonadía de la NES finó con cualesquier triba d'esperanza. En 1986 SEGA remocicó la Mark III y tornóla no que se conoz como Sega Master System pa entrar nos mercaos americanu y européu. El resultáu foi cerníu y, magar n'Estaos Xuníos nun foi quien a plantar cara, n'Europa consiguió un gran éxitu llegando a vender más que la máquina de Nintendo en dellos países, anque nun foi abondo. En 1988 SEGA decidió apostar pola innovación y asoleyó la primer consola de 16 bits del mercáu, la Sega Megadrive, que volvió a ser una llaceria en Xapón. Triada pola PC Engine de Nec Corporation n'oriente, el so saltu a Estaos Xuníos y Europa abultaba un fracasu, pero na Navidá de 1989 Megadrive algamó unes ventes espectaculares desaniciando a la PC Engine del mercáu occidental.

Nos años venideros, Megadrive compitió direutamente cola 16 bits de Nintendo, la Super Nintendo, y recibió interesantes periféricos que nun tuvieron ésitu como Sega MegaCD o Sega 32X, consiguió afitase como líder de ventes n'Europa anque les sos ventes n'EEXX y Xapón y, poro mundiales, foron inferiores a les del sistema de Nintendo. Mentanto SEGA algamara un gran prestixu nel mundiu los arcades con xuegos tan afamaos como Out Run, Shinobi, Afterburner, Virtua Racing o Virtua Fighter. A SEGA namás-y quedaben dos coses por facer, consiguir una mascota que rivalizara con Mario y entrar nel mercáu de les consoles portátiles. Lo primero algamólo con Sonic, el corcuspín azul que se volvió nel estandarte de la compaña, y lo segundo pola mor de Game Gear, una potente consola en color téunicamente bien superior a la Game Boy de Nintendo pero que quedó escaecida pola poca duración de les bateríes.

Igual que fizo colos 16 bitsm SEGA foi la primera en pasar a los 32 bits col amiestu pa la Sega Megadrive nomáu x32, y por primer vegada viose recompensada en Xapón con unes ventes espectaculares durante'l so asoleyu en 1994. Sicasí nel restu del mundu la acoyida foi dalgo más fría y aína foi superada en ventes pola PlayStation de Sony. El resultáu foi que a finales de 1997 la consola ya cuasi sumiera, calteniéndose namás en Xapón hasta 1999 per aciu de xuegos basaos nes llicencies de d'estremaos mangues.

Tres la decepcionante hestoria de Saturn SEGA alcontrábasse nuna grave crisis financiera, pero tovía tuvo tiempu d'aniciar una cabera consola enantes de dexar esti mercáu. Dreamcast asoleyó en 1998, llegando a Europa y Estaos Xuníos en 1999. La consola de 128 bits yera una apuesta a doble o nada, pero SEGA volvió a perder la partida. Los usuarios nun se vieron atrayíos pola potencia de la nueva consola y asitiaron fieles a PlayStation o decidieron esperar l'asoleyu de la nueva PlayStation II pa fincar un pie nos 128 bits. A la fin SEGA dexó de dar encontu oficial a la consola nel entamu de 2001, pero continuó asoleyando xuegos pa ella, siendo'l cabero Puyo Pop Fever en 2004 (anguaño siguen asoleyándose dalgunos xuegos pa la consola, anque namás de xemes en cuando).

Dende la fin de Dreamcast SEGA pasó por una dómina convulsa, con falancies d'adquisición, reestructuraciones internes y el paso a ser una Third-party. Amás durante la cabera década del sieglu XX, el mercáu de los arcades, onde ye la compañía númberu 1, foi amenorgando. Anguaño'l panorama de la empresa ye inciertu y hai poco amestóse con Sammy, un fabricante xaponés de pachinko y recreatives, p'aniciar Sega-Sammy Holdings.

Anguaño SEGA tornóse nun llicenciaor mui fuerte, ya que dempués d'años de rivalidá con Nintendo, agora trabayan a comuña en dellos proyeutos, ún d'ellos foi la versión Arcade de F-Zero, onde Namco, Sega y Nintendo collaboraron xuntos nel so desenrollu, baxo'l nome de TRIFORCE, y dende entós puédense ver xuegos de Sonic y de otros personaxes de SEGA nes consoles de Nintendo, asina como de Sony y Microsoft.

Estudios Internos

Global Entertainment Software R&D, foi dirixíu por Yuji Naka hasta 2006. "GE" céntrase anguaño nel desendolcu de videoxuegos pa consoles.

Departamentu	Miembros de	Dirixíos por	Grandes títulos
G.E. Dept. #1,	Sonic Team	Akinori Nishiyama	Sonic The Hedgehog, Sonic & Knuckles, Sonic Adventure, Sonic and The Secret Rings, Sonic the Hedgehog 2006, Phantasy Star Universe, Fifth Phantom Saga
G.E Dept. #2	United Game Artists	Akira Nishino	Project Rub, The Rub Rabbits, Sonic Riders, Astro Boy, Sonic Riders: Zero Gravity
Sega Studio USA	Sonic Team USA	Takashi Iizuka	Shadow the Hedgehog, Sonic Heroes, Sonic Adventure 2, NiGHTS: Journey of Dreams
Mobile Content R&D	Nuevu estudiu	Kazunari Tsukamoto	Brain Trainer Portable
Sega Studio China	Nuevu estudiu	Makoto Uchida	Denguno hasta la fecha

Amusement Software R&D, Desendolquen anguaño xuegos pa máquines d'arcade.

Departamentu	Miembros de	Dirixíos por	Grandes títulos
AM.1 R&D	WOW Entertainment + Overworks	Atsushi Seimiya	House of the Dead series, Shinobi series, Sakura Taisen series, Phantasy Star series Skies of Arcadia
AM.2 R&D	Sega-AM2	Hiroshi Kataoka	Virtua Fighter series, Virtua Cop series, Out Run series, Shenmue series, After Burner series, Sword of Vermilion
AM.3 R&D	Sega AM3 + Sega Rosso	Mie Kumagai	Crazy Taxi series, Virtual On series, Virtua Tennis series, "Initial D Arcade Stage" series
Family Entertainment	Departamentu nuevu	Hiroshi Uemura	Mushi King series, Love and Berry DS Collection
Sports Design R&D	Smilebit [1]	Takayuki Kawagoe	Mario & Sonic at the Olympic Games, Let's Make a J-League Soccer Team series, Let's Make a J-League Baseball Team series

New Entertainment R&D, diríxilu'l xefe de cada departamentu. "NE" céntrase anguaño nel desendolcu del nuevu conteníu pal mercáu de les máquines arcade y consoles.

Departamentu	Miembros de	Dirixíos por	Grandes títulos
NE.1 R&D	Amusement Vision, Ltd. + Smilebit	Toshihiro Nagoshi	Super Monkey Ball series, Shining Force Neo, Yakuza (Ryū ga Gotoku)
AMPlus R&D	Digitalrex	Yu Suzuki	Psy-Phi, Shenmue Online

Estudios sosidiarios

Los estudios sosidiarios, los primeros foron mercaos o aniciaos durante 2005, foron la piedra angular d'un cambiu inernu dientro de Sega pa llegar a una audiencia más occidental.

Departamentu	Division	Añu de la mierca/de la fundación	Grandes títulos
Sega Racing Studio	Sega of Europe	2005	Sega Rally Revo
The Creative Assembly	Sega of Europe	2005	Total War, Total Warrior series
Sports Interactive	Sega of Europe	2006	Football Manager series
Prope	Sega of Japan	2006	Let's Tap

Hardware

Consoles

SG-1000: Primer videoconsola de sobremesa de Sega, asoleyada en 1983. Sero asoleyaríase un anovamientu col nome de SG-1000 2.
SC-3000: Ordenaor personal basáu na SG-1000 y compatible con esta. Más sero asoleyóse un anovamientu col nome de SC-3000H.
SEGA Mark III: Rempuesta de SEGA a la NES lanzada en 1984.
SEGA Master System: Rediseñu de la Mark III asoleyáu en 1986 pa Xapón y 1987 pa Estaos Xuníos y Europa. Más sero aprució Sega Master System II, una versión de Master System más barata y que n'España foi más afamada que la primera. En Brasil llegó a apaecer una Master System III qu'incorporaba'l xuegu Sonic na memoria interna de la consola, foi descontinuada en 1993, pero en Brasil se sigue aniciando y esiste hasta una Master System IV.
SEGA Mega Drive / SEGA Genesis: Conocida como Mega Drive en Xapón y Europa y como Genesis en América, ye'l mayor éxitu de Sega, conocida por ser la primer consola de 16 bit reales. Foi asoleyada en 1988 en Xapon col nome de Mega Drive, en 1989 n'América baxo'l nome de Genesis y en 1990 n'Europa como Mega Drive. Foi descontinuada en 1998.
SEGA Activator: Accesoriu pa Mega Drive / Genesis. Yera un sistema de control que consistía nun aniellu outogonal d'ochu piezes, dientro del que s'allugaba'l xugador. Articulo sobre Activator en IONLITIO
SEGA VR: Yera un accesorio de realidá virtual pa l'afamada consola Genesis.
Mega CD: Ampliación de Mega Drive pa xugar a títulos en CD, qu'incluyíen películes interactives ente otros.
Mega CD II: Ampliación de Mega Drive II igual que Mega CD pero más económica.
Mega Drive 32x: Otra ampliación pa Mega Drive que tornaba a Mega Drive nuna consola de 32 bits.
SEGA Nomad: Versión portátil de Mega Drive asoleyada namás n'Estaos Xuníos y Xapón.
Game Gear: La consola portátil de Sega qu'asoleyó pa compitir con Game Boy, magar ser muncho meyor qu'esta (téunicamente) con pantaya a too color y bonos xuegos, Game Gear vendióse menos pola por de la so poca portabilidá (pa ser una consola portátil, el so tamañu yera grande abondo) y el gran consumu de piles.(6 pilas AA)
SEGA Saturn: Consola de 32 bits y llector de CD-ROM. Considerada como la meyor en gráficos 2D foi triada por PlayStation de Sony y en parte por Nintendo 64 de Nintendo per aciu del gran marketing d'estes, sobre manera de la primera, y a la increyible dificultá de programar pa la consola de Sega pola mor de los sos múltiples procesadores en paralelu. Foi descontinuada en 1999, y terminó siendo la consola menos vendida de Sega.
SEGA Dreamcast: Consola de 128 bits y llector de GD-ROM. Equipada con un chip gráfico Power VR2 y coneutividá a internet. Ye'l segundu y caberu éxitu de Sega pero, pesia la so exitosa iniciativa comercial, foi sacada del mercáu por bien de razones, ente elles la llegada de Play Station 2. Foi descontinuada en 2002.

Amás aniciáronse estremaes versiones de les sos consoles asina como dellos minixuegos lleutrónicos al xeitu de Nintendo Game & Watch y el Sega Pico, una remestura ente consola y xuguete educativu.

SEGA Zone: Consola Plug and Play llicenciada por SEGA qu'inclúi xuegos clásicos de Mega Drive y xuegos xeitu Wii Sports. El so diseñu ta basao na Wii y inclúi un mando con sensor de movimientu.

Plaques d'arcade

SEGA System: Siete modelos y dellos anovamientos.
SEGA Mega-Tech y Sega Mega Play: Basaes en cartuchos de Master System y Mega Drive.
SEGA ST-V Titan: Basada na Sega Saturn.
SEGA Model: Tres modelos y dellos anovamientos.
SEGA NAOMI: Tres modelos y dellos anovamientos.
SEGA Chihiro: Basada nel hardware del Xbox.
Triforce: Basada en Game Cube y aniciada a comuña con Nintendo y Namco. El nome d'esta placa débese a la xunión d'estes trés compañíes.
Dellos modelos llicenciaos, laserdisc y propios.
SEGA Lindbergh: caberu modelu desenrolláu pal mercáu arcade. Potencia semeyada a PS3 y XBox360.
SEGA Ringedge: Placa de nueva xeneración, basada nun procesaor Intel. L'únicu xuegu asoleyáu funcionando nesta placa ye Border Break. Tien una potencia superior a Lindberg, y ye equivalente a les consoles d'anguaño. Tien una CPU Intel Dual Core E2160 a 1.8 GHz, 1 GB de memoria RAM y una GPU Nvidia GDDR3 equipada con 384 Mb, ente otres carauterístiques encalcaes.
SEGA Ringwide: Versión más económica y de menores prestaciones de la Ringedge. Nun se conocen xuegos pa ella. Ta equipada con una CPU Intel Celeron 440 a 2Ghz, 1 GB de RAM y una GPU AMD GDDR3 equipada con 128 Mb ampliables.