El Monesteriu de San Pedro de Villanueva ta asitiáu na parroquia de Villanueva, nel conceyu de Cangues d'Onís.
Perteneciente a la orden de los Benedictinos, ta consideráu como unu de los exemplos d'arquiteutura románica más importantes d'Asturies.
La primera construción eclesiástica atribuise a la dómina d'Alfonsu I, xenru de don Pelayu. D'esta construción prerrománica nun se conserva anguaño nengún tipu de restos, conservándose sólo les construcciones romániques y barroques.
La ilesia d'una sola nave ye xunto col monesteriu unu de los exemplos más importantes del románicu asturianu. Al entamu la planta de la ilesia constaba de tres naves pero depués de la reforma que tuvo llugar en 1775 pasó a tener sólo una.
Conserva tres ábsides románicos construidos en sillar.
Accédese a la ilesia atravesando una torre-pórticu de 1689 con una portada d'accesu de finales del sieglu XII. Tien cuatro archivoltes de mediu puntu, con decoración floral y xeométrica, sofitándose sobre otros tantos pares de columnes. Los capiteles son interesantes y representen escenes nes que la temática amorosa y la caza son protagonistes (tradicionalmente dizse que amuesen la despedida del rei Favila de la so muyer anantes de partir de caza). Tien otres dos puertes d'entrada una ciega y la otra que da accesu a la capiella de San Miguel.
A los pies de la ilesia perviven los restos del claustru románicu primitivu de finales del sieglu XII. Esti claustru foi sustituyíu na reforma que tuvo llugar ente los años 1674-1694 pol actual claustru barrocu.
