«MOMA» redirixe equí. Pa el distritu de la Provincia de Nampula, ver
Moma.
Exposición nel Muséu d'Arte Moderno de Nueva York.
El Museum of Modern Art, más conocíu pol so acrónimu MoMA, ye un muséu d'arte asitiáu nel Midtown de Manhattan (Nueva York), na 11 West cola cai 53 y ente la Quinta y la Sesta Avenida.
Alluga pieces tales como La nueche estrellada de Van Gogh, Broadway Boogie-Woogie de Piet Mondrian, Les señorites d'Avignon (1907) de Pablo Picasso,[1] La persistencia de la memoria de Salvador Dalí y obres d'artistes norteamericanos como Jackson Pollock, Andy Warhol y Edward Hopper.
Foi fundáu en 1929 poles filántropes estauxunidenses Lillie P. Bliss, Mary Quinn Sullivan y Abby Aldrich Rockefeller,[2], pa «ayudar a la xente a entender, usar y esfrutar de les artes visuales del nuesu tiempu». Abrió les sos puertes al públicu'l 7 de payares de 1929[3] . El muséu ye unu de los más grandes del país.
Carauterístiques
El Muséu fundóse como entidá privada, beneficiándose de numberoses donaciones de los sos miembros y d'empreses, siendo un exemplu pa otros museos de la so clase, ampliando les fronteres del arte a disciplines ensin almitir n'otres galeríes.
Ye consideráu unu de los santuarios del arte moderno y contemporaneu del mundu, constituyendo (a xuiciu de munchos) una de les meyores coleiciones d'obres maestres. El MoMA tien amás importantes coleiciones de diseñu gráficu, diseñu industrial, fotografía, arquiteutura, cine ya impresos.
Influencia
Cuando'l Muséu d'Arte Moderno empezó a esponer les sos obres, gran parte del públicu d'aquella dómina despreciaba'l cubismu y l'arte astracto, porque topetaben coles llinies direutrices qu'hasta esi momentu marcaben la pauta del "verdaderu arte".[4]
De les primeres vanguardies del sieglu XX, el MoMA conserva obres clave de Pablo Picasso,[5] como Les señorites d'Avignon, según el cuadru La persistencia de la memoria de Salvador Dalí, ente otros de Marc Chagall, Kandinsky, Mondrian, Henri Matisse, etc. Tien un Xardín d'Escultures con obres Auguste Rodin, Alexander Calder, Louise Nevelson, Pablo Serrano y Aristide Maillol, amás d'una sala de cine.
En 1997, l'arquiteutu xaponés Yoshio Taniguchi superó a otros diez arquiteutos internacionales al ganar el concursu pa executar el nuevu diseñu del muséu. Dempués de cuatro años de reformes, en 2004 foi inauguráu'l nuevu MoMA, con casi'l doble d'espaciu. En 2012 foi'l primer muséu del mundu n'adquirir el códigu fonte de videoxuegos al consideralos arte, ente ellos, Pac-Man (1980) y Tetris (1984).[6]
La coleición tamién inclúi obres de lleendes de diseñu del mundu como Livio Castiglioni, Achille Castiglioni, Pier Giacomo Castiglioni.
Referencies
Bibliografía
- Jesús Pedro Lorente, Los Museos de arte contemporáneo: noción y desarrollo histórico, Gijón, Trea, 2008 (castellán)
Enllaces esternos
