Joseph Henri Maurice Richard (4 d'agostu de 1921, Montreal – 27 de mayu de 2000, Montreal), moteyáu como Rocket Richard, foi un xugador canadiense de ḥoquei sobre xelu que xugó como atacante derechu nos Canadiens de Montréal, dende 1942 hasta 1960. Rocket ta consideráu como unu de los mayores goliadores na hestoria de la NHL: foi la primer persona qu'anotó más de 500 goles en tola so carrera (544 tantos), y tamién consiguió ser el primeru n'anotar 50 goles en solu 50 partíos d'una temporada regular (añu 1944-45).
Richard ganó la Copa Stanley con Montreal n'ocho causes, y foi'l capitán del equipu nos cinco copes consecutives llograes dende 1955 hasta 1960. Nel so honor, dende 1998 la LNH apurre un troféu llamáu Troféu Maurice Richard, que s'otorga a la persona que más goles anotó en tola temporada regular.
Biografía
Richard empezó a xugar profesionalmente al ḥoquei sobre xelu en 1942, colos Canadiens de Montréal. Anque empezó a xugar col dorsal númberu 15, llueu lo camudó pol númberu 9. Facer n'honor al so primer fíu, Huguette, que pesó 9 llibres (4,08 kg) al nacer. Pudo faelo porque, mientres la Segunda Guerra Mundial, l'exércitu de Canadá refugó'l so ingresu en trés causes; dos comos soldáu rasu (por diverses mancadures) y una como mecánicu, por non tener titulación a pesar de que trabayó nello dende los dieciséis años. Pa cuando Maurice llogró sacase'l títulu de mecánica na Escuela Téunica de Montreal, la guerra terminara.
A lo llargo de les temporaes foi ameyorando les sos estadístiques. Na campaña 1943-44 ganó'l so primer Stanley Cup, contribuyendo con 32 goles y 22 asistencies. Na campaña 1944-45 consiguió, per primer vegada, anotar 50 goles nos 50 partíos de la temporada regular, siendo esa la so mayor temporada n'anotación. Volvería llograr colos Canadiens el títulu de campeón en 1945-46. Mientres esos años desenvolvió una fuerte rivalidá con otros xugadores, como Gordie Howe de los Detroit Red Wings.
Richard tamién foi'l protagonista de diversos momentos históricos del ḥoquei. En 1952, mientres un partíu contra Boston Bruins, llogró reponese d'una fuerte entrada d'un defensa que lu dexó inconsciente, y consiguió anotar el gol que dio la victoria a los Canadiens coles sos facultaes inda amenorgaes. Esi mesmu añu superó al máximu goliador daquella de la NHL, Neis Stewart, al anotar el gol númberu 326 na so carrera. El so temperamentu tamién lu xugó males pasaes, siendo espulsáu en 1955 por baltar d'una puñada a un árbitru. La decisión del presidente de la LNH, Clarence Campbell, de suspende-y el restu de la temporada causó indignación n'el siguidores de Montreal, que llegaron a provocar disturbios na ciudá. A pesar de perdese dellos partíos, Maurice superó'l so récor de puntos (38 goles y 36 asistencies).
A partir de 1956 Richard empecipiaría'l so periodu de los cinco Copes Stanley consecutives, y superó la marca de 500 goles mientres la temporada regular. En perdiéndose dellos alcuentros por diverses mancadures, Maurice dio fin a la so carrera en 1960, ganando a Toronto nes series finales. Tan solo un mes dempués, los Canadiens retiraron el dosal #9 n'honor al so xugador, y en 1961 ingresó nel Salón de la Fama del Ḥoquei. N'abandonando como xugador, trató de siguir como entrenador nos Nordiques de Quebec de la World Ḥoquei Association, anque arrenunció a los dos selmanes de roblar el so contratu por motivos familiares.
Richard siguió siendo homenaxáu mientres el restu de la so vida, y tuvo consideráu como unu de los personaxes más célebres de Quebec y Canadá, llegando a recibir la Orde de Canadá en 1967. Cuando los Canadiens abandonaron en 1996 el Forum de Montreal pa treslladase a Centre Bell, decidieron homenaxar a los sos xugadores históricos que siguíen vivos. Maurice Richard recibió la ovación del públicu más llarga de la nueche, que duró dieciséis minutos. En 1998 la LNH decidió que'l premiu al máximu goliador pasara a llamase Troféu Maurice Richard, con un troféu ufiertáu polos Canadiens de Montréal. Y en 1999, una de les franquicies de la Ligue de ḥoquei junior majeur du Québec pasó a llamase Rocket de Montreal n'honor al xugador.
Maurice Richard finó'l 27 de xunu de 2000 en Montreal. Al so veloriu asistieron más de 115.000 persones, y el gobiernu de Canadá decidió realizar un funeral d'Estáu n'honor al xugador, que foi emitíu en tol país.
Trayeutoria y estadístiques
Plantía de los Canadiens en 1942(de pies, segundu a la derecha).Escultura n'honor a Maurice Richard, que puede atopase en Gatineau.
