Manuela de los Herreros Sorà (10 de xunu de 1845, Palma – 29 d'abril de 1911, Palma) foi una escritora y alministradora de calter costumista mallorquina. Dende temprana edá, amosóse interesada na cultura, cuantimás, l'aprendizaxe de llingües. Tuvo en contautu, gracies a la posición social del so padre, col Archiduque Luis Salvador d'Austria.[1]
Biografía
Manuela de los Herreros y Sorà nació en Palma'l 10 de xunu de 1845, nuna familia con un altu nivel cultural, lo que-y abriría les puertes a una educación a la que bien poques muyeres de la so dómina podíen aportar. El so padre, Manuel de los Herreros, foi direutor del Institutu Balear (institución que tuvo un pesu perimportante na renovación pedagóxica de les Islles Baleares) y unu de los sos tíos per parte de madre foi caderalgu. Emparentada con figures venceyaes al mundu de la cultura, dende bien pequeña amosó un gran interés pola llectura que la fixo destacar ente les alumnes de les escueles de Bernat Homar y Alexandre Perelló. De la mesma destacó, más palantre, pola so conocencia del inglés, el francés, l'italianu y l'alemán, aparte del catalán (la so llingua materna).[2]
Antes de casase, nuna dómina na que llevó una intensa actividá como escritora, yera habitual vela nel Atenéu Balear (que s'acababa d'abrir a les muyeres) pero arriendes del so matrimoniu col abogáu Enric Bonet i Ferrer en 1872 y de los catorce fíos que tuvieron, menguó la so dedicación a esti ámbitu. Mientres los años de más implicación col mundu lliterariu escribió en prosa y en versu obres de temática costumista, formó parte de les redacciones de delles publicaciones costumistes mallorquines como La Dulzaina, La Revista Balar y el calendariu El Saracossano y publicó en revistes del Principáu como Lo Gai Saber y Calendari Català.[3] D'esta mesma dómina, destaquen les sos bones rellaciones con #los escritores catalanes más destacaos de la Renaixença que s'acompañaben, sicasí, de la so voluntá de nun formar parte de los certámenes nin de los Xuegos Florales y de nun axuntar tola la so producción lliteraria nun volume.[4]
Manuela enviudó en 1899 y cuatro años dempués, en 1903, morrió'l so padre que, amás de direutor del Institutu Balear fuera presidente de la Sociedá Económica d'Amigos del País, y collaborador lliterariu y alministrador del Archiduque Luis Salvador d'Austria. En quedando güérfana de padre siguió cola xera qu'esti realizaba y ocupó el puestu d'alministradora del Archiduque. Morrió'l 29 d'abril de 1911 en Palma, ciudá de la que sería llamada fía pernomada n'avientu de 1915. Tien una cai dedicada nel barriu de Son Pastilla, onde s'atopo l'acuariu de la ciudá, la Palma Aquarium.[4]
Referencies
.jpg)
