Joseph Farrell MacDonald (6 de xunu de 1875, Waterbury – 2 d'agostu de 1952, Hollywood) foi un actor teatral y cinematográficu d'Estaos Xuníos, especializáu na interpretación de personaxes de repartu. MacDonald, que dacuando apaecía sol nome de "John Farrell Macdonald", "J.F. Mcdonald", "Joseph Farrell Macdonald" y otres variantes, actuó en más de 325 películes a lo llargo d'una carrera de 41 años empecipiada en 1911 y finalizafa en 1951, dirixendo amás 44 filmes mudos dende 1912 a 1917.[2]
Nacíu en Waterbury, Connecticut, al prinicipio de la so carrera artística MacDonald yera cantante de shows minstrel, y viaxó a lo llargo de dos años polos Estaos Xuníos actuando en representaciones teatrales. El so primer filme mudu foi un curtiu dramáticu de 1911 tituláu The Scarlett Letter,[3] fechu pol estudiu de Carl LaemmleIndependent Moving Pictures, precursor d'Universal Studios.[4] A partir d'entós actuó en numberosos filmes al añu, y a partir de 1912 tamién se dedicó a la direición. El so debú como direutor llegó con The Worth of a Man,[5] otru curtiu dramáticu, tamién de IMP, dirixendo otres 43 cintes más, la postrera la producción de 1917 Over the Fence, dirixida en collaboración con Harold Lloyd.[6] MacDonald conociera a Lloyd dellos años enantes, cuando Lloyd yera extra, ufiertándo-y trabayu, al igual que fizo con Hal Roach, interpretando dambos pequeños papeles en The Patchwork Girl of Oz, película empobinada por MacDonald en 1914. Cuando Roach fundó'l so propiu estudiu, con Lloyd como la so principal atraición, contrató a MacDonald como direutor.[4]
En 1918 MacDonald yá yera unu de los actores de calter más apreciaos de Hollywood,[4] dexando la direición y dedicándose dafechu a l'actuación, predominantemente en westerns y comedies d'ambiente irlandés. El so primer trabayu col direutor John Ford foi la película de 1919 A Fight for Love,[7] rodando otros trés con él esi mesmu añu. En total, dende 1919 a 1950 MacDonald actuó pa Ford en 25 películes, destacando na dómina muda The Iron Horse (1924), Tres homes malos (1926) y Riley the Cop (1927).[4]
Con una voz que cuadraba cola so personalidá, MacDonald superó con facilidá la transición al cine sonoru ensin descensu perceptible nel so trabayu interpretativu, notando, si acasu, una medría nel mesmu. En 1931, por casu, MacDonald actuó en 14 películes – ente elles la primer versión de The Maltese Falcon, nel papel del "Detective Tom Polhaus" – y en 22 d'elles en 1932. Anque solía encarnar a obreros, policías, militares y sacerdotes, ente otros personaxes, los sos papeles yeren daqué especiales: teníen nome, y davezu apaecíen nos creitos. Una de les actuaciones más destacaes d'esi periodu foi la que fizo como "Mr. Tramp" en Our Little Girl, con Shirley Temple (1935).[8]
Nos años 1940 MacDonald formó parte de la compañía d'actores de calter de Preston Sturges, actuando en siete film escritos y empobinaos por Sturges.[9] El so trabayu nes películes de Sturges foi xeneralmente ensin creitos, lo cual diba sucedioendo cada vegada con mayor frecuencia según avanzaba la so carrera – anque la calidá del so trabayu nun menguaba. Foi notable'l so papel na cinta de 1946 dirixida por John Ford My Darling Clementine, na cual yera "Mac," el cantinero del saloon.[4]
La postrera película de MacDonald, de 1951, foi una comedia titulada Elopement.[10] Esi mesmu añu tamién fixo les sos escases actuaciones televisives. J. Farrell MacDonald finó en Hollywood, California, en 1952, a los 77 años d'edá. Los sos restos fueron incineraos y depositaos nel Crematoriu Chapel of the Pines de Los Angeles. Había estáu casáu cola actriz Edith Bostwick hasta la muerte d'ella en 1943. Tuvieron una fía, Lorna.
↑ 1,01,1Afirmao en: SNAC. Identificador SNAC Ark: w6x20bfv. Apaez como: J. Farrell MacDonald. Data de consulta: 9 ochobre 2017. Llingua de la obra o nome: inglés.
_trailer.jpg)
