Dempués d'una infancia aturbolinada, que tuvo marcada poles drogues y l'abusu d'alcohol y dos estancies en rehabilitación,[4] Barrymore escribió en 1990 l'autobiografía, Little Girl Lost. Ella tuvo ésitu na transición de neña estrella a actriz adulta con una serie de películes, incluyendo Bad Girls, Boys on the Side, y Everyone Says I Love You. Darréu, establecióse ella mesma en comedies romántiques como The Wedding Singer y Lucky You.
Los sos padres yeren Ildiko Jaid Mako y John Drew Barrymore. El so padre yera d'ascendencia inglesa ya irlandesa, ente que la so madre nació nun campu de refuxaos pa húngaros n'Alemaña.[4][8] El so padre foi fíu de John Barrymore, unu de los actores más importantes y prestixosos del cine hollywoodiense mientres la década de los años 30, y mediohermanu de l'actriz Diana Barrymore. Los sos tíos güelos Lionel Barrymore y Ethel Barrymore tamién fueron reconocíos actores, anque destacaron principalmente en teatru.
Drew protagonizó la so primer apaición en televisión nun anunciu pa Gainesburger Puppy Food. El so debú en cine llegaría-y con tan solu cuatro años al interpretar a la fía de William Hurt en Altered States (1979), un filme de ciencia-ficción dirixíu por Ken Russell.
A los seis años Drew fixo una prueba pa Poltergeist del so padrín Steven Spielberg. A pesar del contautu, Drew nun foi escoyida pal papel; sicasí sí pudo consiguir el de la pequeña Gertie en E.T. the Extra-Terrestial (1982). Gracies a esta apaición consiguió un Premiu Mocedá nel Cine y una candidatura a los Premios de l'Academia Británica de Cine y Televisión (BAFTA) na categoría d'Actriz Novel más Destacada.
A los once, la so madre empezó a llevala a castings pa televisión.
Fixo delles apaiciones en televisión como en The tonight Show de Johnny Carson y foi la presentadora más nueva de Saturday Night Live.
Con 13 años, Drew foi víctima de les drogues y l'alcohol. Inda siguía trabayando. Foi estrella de tres películes más, Firestarter (1984), Irreconcilable Differences (1984) y Cat's Eye (1985).
El 28 de xunu de 1988 tomóse una decisión que-y camudaría la vida. Drew foi ingresada na ASAP Treatment Center (un centru pa tratar la drogadicción y los problemes mentales) pola so madre. Dempués d'años de autodestrucción, intentu de suicidiu incluyíu, finalmente volvió al bon camín. El pasu más grande que dio foi'l publicar la so autobiografía titulada Little Girl Lost a los 14 años. Dende'l café teatru a los especiales del colexu y depués a películes de baxu presupuestu como A Conspiracy of Love (1987), See You in the Morning (1989), Far from home (1989), hasta volver finalmente a la gran pantalla.
Edá adulta
Yá rehabilitada y col deséu de recuperar el tiempu perdíu, l'actriz vuelve retomar la so carrera a mediaos de los 90, gracies a la so apaición en películes como Bad girls (1994), Batman Forever (1995), Scream (1996), Mad love (1995) o Everyone Says I Love You (1996).
A los 19 años, Drew casóse con Jeremy Thomas, propietariu d'un chigre, un matrimoniu que duró tres meses. Como la so carrera empezaba a espolletar con películes y apaiciones diverses, a Drew propúnxose-y apaecer en revistes y otres publicaciones como Guess, Playboy o Interview, nestos dos últimes salió desnuda lo que consolidó la so imaxe sexy.
En 1995, Barrymore formó Flower Films, una productora, cola so socia de negocios, Nancy Juvonen. La primer película producida pola empresa foi en 1999, Never Been Kissed. La segunda ufierta de la compañía foi Charlie's Angels (2000), un gran ésitu de taquilla en 2000, qu'ayudó a solidificar la posición de dambes, Barrymore y la empresa. Cuando se vio amenazada la producción de la primer película de Richard Kelly, Donnie Darko, Barrymore dio un pasu alantre col financiamientu de Flower Films y tomó el pequeñu papel de Karen Pomeroy, profesora d'Inglés del protagonista.
Amás d'una serie d'apaiciones en películes producíes pola so compañía, Flower Films, incluyendo Charlie's Angels. Barrymore tuvo un papel dramáticu na película de comedia dramática Riding in Cars with Boys (2001), interpretando a una madre adolescente nun matrimoniu fracasáu con un maríu drogadictu (basada na historia de la vida real de Beverly D'Onofrio). En 2002 Barrymore apaeció en Confessions of a Dangerous Mind, xunto a Sam Rockwell y Julia Roberts.
En xunetu de 2001 Barrymore casóse col actor Tom Green, del que se dixebró n'ochobre de 2002, alegando que la pareya tenía "diferencies irreconciliables". Barrymore casóse con William Kopelman nel mes de xunu de 2012. En setiembre de 2012 nació la so primer fía, Olive Barrymore Kopelman. La so segunda fía, Frankie, nació n'abril de 2014.
A Barrymore ye frecuente vela collaborar con numberoses causes solidaries. Actúa como voceru nacional de la Fundación Pro Salú de la Muyer, una organización ensin fines d'arriquecimientu dedicada a concenciar sobre la necesidá de prauticar sexu seguro al traviés del usu de preservativos. Tamién participa activa y económicamente con Wildlife Waystation, una organización que'l so oxetivu ye rescatar y acoyer animales de tol mundu.
Barrymore apaeció nel show d'Oprah Winfrey donando un millón de dólares a la fundación d'alimentación del mundu pa donar comida a los neños d'África.
Tamién amplió'l so negociu llanzando una marca de vinos, Barrymore Wines. La so primer collecha foi un Pinot Grigio, un vinu blanco afrutado con arume a piescu y a cítricos del que sacó 2.000 botelles pal mercáu norteamericanu.
Barrymore tamién ye fotógrafa. Los sos trabayos fueron notables en delles revistes de moda por modelos y actrices famoses como Rachel McAdams.
