David Richard Solberg (28 d'agostu de 1943, Chicago – 4 de xineru de 2024, Londres), conocíu artísticamente como David Soul, foi un actor de televisión y cine, y cantante d'Estaos Xuníos, nacionalizáu británicu. Llogró la so ciudadanía británica en 2004.
Biografía
Fíu d'un pastor luteranu que participó na reconstrucción d'Alemaña tres la II Guerra Mundial, Soul viaxó con frecuencia a esi país mientres la so infancia.
Empezó a ser conocíu poles sos intervenciones nel espaciu The Merv Griffin Show en 1967, nel qu'apaecía cantando, despintando la so cara con un pasamontañas. Llámome David Soul, y quiero ser conocíu pola mio música, yera la so esplicación.
A fines de la década de 1960 y principios de la década de 1970, intervieno en numberoses series de televisión, como Here Come the Brides, Owen Marshall: Counselor at Law, I Dream of Jeannie, McMillan and Wife, Cannon, Gunsmoke, All in the Family, Star Trek: The Original Series, The Streets of San Francisco, etc.
Sicasí'l estatus d'estrella de la televisión llegó-y gracies al papel del detective Ken "Hutch" Hutchinson, na serie de cultu Starsky & Hutch, que protagonizó xunto a Paul Michael Glaser ente 1975 y 1979.
Paralelamente llanzó la so carrera musical, de la que destaquen les temes Don't Give Up on Us (1977), que aportó a númberu unu en Reinu Xuníu, y Silver Lady (1977).
La so carrera cinematográfica foi muncho más amenorgada, destacando un papel en Magnum Force (1973), xunto a Clint Eastwood y na película de terror Salem's Lot (1979), basada na novela de Stephen King.
El so cayente artísticu na década de 1980 fíxo-y cayer nel alcoholismu. Sicasí siguió apaeciendo n'episodios de series de televisión y nel filme In The Line Of Duty: The FBI Murders (1988). Na década de 1990 treslladóse a Londres, Reinu Xuníu, retomando la so carrera interpretativa, nesti casu sobre los escenarios del West End de Londres, participando en montaxes como Jerry Springer - The Opera (2004) y Mack and Mabel (2006).
En 2004 llogró la nacionalidá británica. Tamién apaeció na adautación cinematográfica, de Starsky & Hutch (2004), faciendo un cameo del so personaxe, nos últimos minutos d'ésta.
Bibliografía
Referencies
Enllaces esternos
