Bukhará ye, xunto con Samarcanda, una de les dos ciudaes históriques de la cultura uzbeca n'Uzbequistán. La mayor parte de la so población ye cultural y lingüísticamente uzbeca, a pesar de que la ciudá, como Samarcanda, foi incorporada a la República Socialista Soviética d'Uzbequistán mientres el periodu soviéticu. Bukhará tamién ye llar d'una antigua comunidá xudía, que se remonta 2500 años tras, anque anguaño solo 3000 xudíos moren na ciudá.[2] El términu de xudíu de Bukhará ye davezu usáu pa describir a tolos xudíos provenientes d'Asia Central.
Historia
Bukhará foi unu de los principales centros de la civilización uzbeca a lo llargo de la historia. La so arquiteutura y sitios arqueolóxicos formen parte de les pilastres de la historia y arte turco. La rexón de Bukhará foi mientres un llargu periodu parte del Imperiu Temurida. L'orixe de los sos habitantes data del periodu d'inmigración aria a la rexón. Los sogdianos habitaron esta rexón los cualos, sieglos dempués, habríen d'adoptar l'idioma persa. Foi capital del Kanatu y Emiratu homónimos antes de ser absorbida pol Imperiu Rusu y depués pola Xunión Soviética como la República Popular Soviética de Bukhará. El postreru emir de Bukhará foi Muhammad Alim Khan (1880-1944).
Cultura
Bukhará foi tradicionalmente el principal centru de cultura islámica n'Asia Central. Tres La Meca ye'l segundu centru de pelegrinación musulmana.
El pensador Avicena nació en Bukhará el sieglu X y ellí vivió mientres munchos años. D'ella yera tamién natural Bukhari, unu de los principales recopiladores de tradiciones del profeta (ahādīz) de la tradición musulmana sunní.
Tresporte
La estación de tren de Bukhara
Del Aeropuertu de Bukhará salen vuelos escontra otres ciudaes d'Uzbequistán y Rusia. L'autopista M37 coneuta la ciudá con Turkmenistán, incluyida la so capital Axgabat. Tamién hai enllaces ferroviarios col restu d'Uzbequistán, y ye un centru pa les carreteres que conducen a les principales ciudaes d'Uzbequistán y más allá.
