Axel Paulsen nació en Aker, una llocalidá de Noruega cercana a Oslo, el 18 de xunetu de 1855.[n. 1] Los sos padres yeren Johan Peter Paulsen, un comerciante de café, y Haagine Olsen. Axel Paulsen. Axel Paulsen
creció na ciudá d'Oslu, entós conocíu como Christiania, onde'l so padre tenía'l so negociu.[3] Destacó llueu nel patinaxe sobre xelu y embarcóse nuna esitosa carrera deportiva, participando en competiciones y exhibiciones n'Europa, Estaos Xuníos y Canadá.[4][5]
Paulsen casóse con Kathryn Williams en 1885 o 1886, pero'l matrimoniu eslleir en 1890. Contraxo segundes nupcias en 1893 con Anna Elise Nicolaisen. El so fíu, Harry, siguió les sos buelgues y foi campeón noruegu de patinaxe artísticu en cinco causes.[3] Tres la so retirada deportiva, tomó les riendes del negociu paternu xunto col so hermanu Edvin. Foi direutor hasta 1936, dos años antes de la so muerte a la edá de 83 años.[3]
Carrera deportiva
Johan Paulsen yera un vidueñu patinador sobre xelu y llevaba a tolos sos fíos a patinar les fines de selmana a Østensjøvannet, un llagu de la capital noruega. Axel entusiasmóse rápido pol deporte y practicaba inclusive los díes de diariu, antes de la escuela. Col tiempu aportó al meyor patinador noruegu en patinaxe de velocidá y patinaxe artísticu.[3]
Paulsen ganó la carrera de 5000 metros nuna competición nacional d'importancia en 1880.[6]
El so debú deportivu internacional tuvo llugar nel Gran Tornéu Internacional de Patinaxe, la primer competición a nivel mundial de patinaxe sobre xelu, celebrada en Viena en 1882. Ganó la carrera de velocidá y quedó terceru na competición de patinaxe artísticu, anque llogró un premiu pola so figura especial, consistente nun saltu d'una revolución y media nel aire, que pasó a conocese como'l saltu de Axel Paulsen» o, a cencielles, «axel».[3][5]
El 8 de febreru de 1983 participó nuna competición de velocidá nel parque Washington, en Brooklyn, Estaos Xuníos, onde ganó a los diecisiete patinadores más rápidos de Noruega, Inglaterra, Estaos Xuníos y Canadá.[7] Nel mesmu añu sufrió una derrota en Halifax, Canadá, nuna pista con curves bien zarraes que nun podía tomar a muncha velocidá.[6] En 1984 tornó a América y ganó toles carreres gracies a un cambéu de diseñu de los sos patinos p'afaelos a les curves pronunciaes, polo que recibió'l títulu de «campeón amateur del mundu».[3][5][6] Según l'autor Brian Flood, los récores de velocidá qu'estableció mientres les carreres y exhibiciones n'Estaos Xuníos y Canadá mientres les sos visites a estos países inspiraron a aficionaos y profesionales, qu'hasta entós raramente tomaben nota de los tiempos emplegaos en cubrir les distancies y contribuyeron a una anovada afición pol deporte del patinaxe de velocidá n'América.[7]
En xineru de 1885 celebróse un campeonatu internacional de patinaxe sobre xelu en Hamburgu, onde Paulsen, n'escelente forma, ganó la carrera de patinaxe de velocidá y quedó en tercer puestu en patinaxe artísticu.[8] En febreru de 1885, participó xunto col so compatriota Carl Verner nun desafíu contra los holandeses Renke van der Zee y Benedictus Kingma pa determinar quién yera'l meyor patinador por aciu una carrera de 4827 metros en Frognerkilen, Noruega. Asistieron ente 20 000 y 30 000 espectadores. Paulsen llogró la victoria, llegando a la meta un minutu y cinco segundos primero que van der Zee.[3][6]
Plusmarcas
Paulsen estableció les siguientes marques mundiales mientres la so carrera:[3]
1885: una milla en 3 minutos 26,4 segundos nuna milla
1886: una milla en 3 minutos 5,4 segundos nuna milla *1885:
diez milles en 39 minutos 7,4 segundos
1886: tres milles en 10 minutos 33,0 segundos
1889: venti milles en 1 hora, 9 minutos y 15,0 segundos
Influencia nel deporte y honores
Esquema del axel, saltu inventáu por Axel Paulsen
Amás d'inventar el famosu saltu que lleva'l so nome, y d'introducir un nuevu diseñu pa los patinos sobre xelu,[4] Axel Paulsen influyó nel desarrollu del patinaxe artísticu como deporte. El so estilu nórdicu» de patinaxe, carauterizáu pola velocidá, movimientos amplios y atleticismo atraxo gran atención pol so contraste col estilu vienés», en boga hasta entós, que primaba'l trazáu de figures complicaes sobre'l xelu a mariña del aspeutu físicu; de la fusión de dambes escueles surdió l'estilu internacional», más similar al patinaxe artísticu de competición modernu. Tamién se-y atribúi la introducción de la postura típica del patinaxe de velocidá, de brazos cruciaos por detrás del llombu.[5]
En 1910, nel vigésimoquinto aniversariu de la so victoria sobre van der Zee, el Club de Patinaxe d'Oslu nomó-y miembru honorariu.[3] En 1976, foi incluyíu nel Salón de la Fama del Patinaxe Artísticu, como reconocencia a les sos contribuciones nesti deporte.[4]
↑ 4,04,14,2Hines, James R. (2011). Historical Dictionary of Figure Skating (n'inglés). Scarecrow Press, páx. 27. ISBN 9780810870857.
↑ 5,05,15,25,3Fluegge, Olga (20 d'agostu de 2012). «130 years of the axel jump» (inglés). World Figure Skating. Archiváu dende l'orixinal, el 2016-03-13. Consultáu'l 31 d'avientu de 2015.
