Mide aproximao 12,5 cm de llargor. La parte cimera del so cuerpu ye de color pardu buxu con bandes más escures. El gargüelu y la zona alta del pechu son d'un tonu daqué rosáu, los lladrales presenten una coloración rosa amarellentáu con llistes negres y el banduyu ye ablancazáu; la frente y la barbadiella son coloraos y na tiesta dispónse una mancha del mesmu color anque más intensu. Dellos manches negres distribúinse percima y debaxo'l picu.
Xeneralmente añera sobre coníferes, abedurios, umeros o sauces. El ñeru tien forma de copa y suel tar fechu de palinos, pequeñes cañes, raigaños, liquen y plumes, y nel so interior deposítense unos 4 o 5 güevos, anque en delles oportunidaes son namái 3 y n'otres algamen los 7. Éstos guárialos la fema mientres 10 a 13 díes aproximao. Los dos proxenitores alimenten les críes y al cabu de 11 a 14 díes dende la eclosión, abandonen el nieru. El pardín de baberu fai una o dos puestes añales.
Aliméntase principalmente de granes (n'especial d'abeduriu y umeru) pero dacuando consume tamién inseutos. Ye una ave diurna.
