بطليموس التالت
،  و
معلومات شخصيه
الميلاد	سنة 284 ق م
تاريخ الوفاة	سنة 222 ق م
مواطنه	مصر الفرعونيه
الزوجة	برينيكى التانيه
ابناء	بطليموس الرابع ،  وارسينوى التالته ،  وماجاس مصر
الاب	بطليموس التانى
الام	ارسينوى الاولانيه
اخوه و اخوات	برنيس ،  وليسيماخوس
عيله	البطالمه
مناصب
فرعون
بطليموس التانى   بطليموس الرابع
اللغات المحكيه او المكتوبه	لغه يونانى قديم
تعديل مصدري - تعديل

بطليموس التالت يورجيتس ( الخير ) - باليونانى : Πτολεμαῖος Εὐεργέτης - ، ( اتولد ح 282 فبل الميلاد - إتوفى 221 قبل الميلاد ). تالت ملوك الدوله البطلميه فى مصر و إبن بطليموس التانى فيلادلفيوس. حكم مصر من سنة 246 لسنة 221 قبل الميلاد.

حارب بلاد الشام عشان ينتقم لأخته اللى اتقتلت مع ابنها قبل وصول الجيش المصري. إستولى على بابل و قدر بفضل قوة الإسطول المصرى إنه يسيطر على جزء من جنوب شرق اسيا الصغرى.

اتجوز " برينيكى التانيه " اميرة قورنيه وبنت ماجاس اخو ابوه اللى مش شقيق عشان يعضد مكانة مصر عن طريق المصاهره.

مصر فى عهده بقت قوه كبيره و عاصمه للثقافه و العلم و النور فى منطقة البحر المتوسط.

مفيش حاجات كتيره معروفه عن نشإة بطليموس التالت و حياته قبل سنة 245 ق.م. بعد فترة خطبه طويله اتجوز برينيكى التانيه بنت " ماجاس " ملك قورنيه فقدر إنه يضم قورنيه لمصر اللى كات انفصلت عنها سنة 258 ق.م.

بعد كده بشويه بطليموس التالت هاجم سوريا عشان ينتقم لقتل اخته أرملة الملك انطيوخوس التاني. قدر الاسطول المصرى إنه يتوغل فى جنوب شرق اسيا الصغرى و يستولى على جزر جنب سواحل اسيا الصغرى. و فى نفس الوقت قدرت القوات البريه بقيادة بطليموس التالت انها تتوغل فى ميسوبوتاميا ( منطقة ما بين النهرين ) لغاية بابل. و بعدها بسنة لما اتعملت إتفاقية سلام قدر بطليموس التالت إنه يخلى جزء من سوريا من ضمنه انطاكيه و مناطق فى اسيا الصغرى و منطقة قليقية جزء من المملكة المصرية البطلمية.

برغم كده، بطليموس التالت حاول دايم انه يجنب مصر الحروب اللى فضلت دايره فى سوريا و مقدونيا بين الملوك المتصارعين هناك و بين المقدونيين و السبرطيين . و اكتفى بتقديم مساعدات للمناطق المتضرره زى لما قدم مساعدة لـ رودس اللى ضربها زلزال جامد و منح لجؤ لملك سبارطه سنة 222 ق.م.

بطليموس التالت كان همه إنه يحافظ على مملكته و يخلى مصر قويه و مستقره و متقدمه، فكان بيعتمد على الدبلوماسيه فى تسيير علاقات مصر بالعالم الخارجي.

جوه مصر استمر بطليموس التالت فى تطوير منطقة الفيوم اللى أبوه بطليموس التانى اهتم بيها و بدا يطورها. و عدل التقويم و خلاه يبتدى من سنة 311 ق.م بإعتبارها السنة اللى اتأسست فيها الدوله البطلميه فى مصر، و بكده بدل السنه المقدونيه بالسنه الشمسيه المصريه. و صدر مرسوم كانوبى عن مجمع الكهنوت المصرى بإن السنة الحقيقيه مدتها 365 و ربع يوم. و اتضاف يوم زياده كل اربع سنين.

بطليموس التالت صلح التماثيل و المعابد المصريه اللى كان الفرس خربوها لما غزوا مصر قبل الاسكندر الاكبر و اتبرع للمعابد المصريه و بكده كسب حب المصريين. و فوق كده ابتدا يبنى معبد ادفو فى الصعيد اللى بقى تحفه من تحف العصر البطلمي.

كرد جميل من الكهنه المصريين عملوا نظام مخصوص لتكريم بطليموس التالت و مراته و عملوا أعياد سنويه للإحتفال بيهم، و ربطوا بين بنتهم المتوفيه و الإله اوزوريس و عملوا ليها طقوس.

فى اسكندريه اللى بقت عاصمة العلم و النور فى العالم، استمرالنمو الثقافى و النشاط العلمي. فى عهد بطليموس التالت عاش عالم اللغات اريسطوفانس اللى درس فى مدارس اسكندريه و بقى رئيس مكتبة اسكندريه، و عاش اراتوسثينس مخترع الجغرافيا الفلكيه و اللى كان رئيس مدرسة الرياضيات السكندريه و صحح غلطات تاريخيه عملها مانيتون ، و الشاعر ابولونيوس ، و كاتب التراجيديات ليكوفورن.

بطليموس التالت اتجوز برينيكى التانيه بنت ماجاس اخو ابوه المش شقيق اللى كانت ساعات بتتسمى كليوباترا زى ملكات مصر التانيين فى العصر البطلمى، و خلف منها بطليموس و ماجاس.

بعد ما بطليموس التالت عمل وصية بإن ابنه بطليموس الرابع يورث عرش مصر، إتوفى بعد ما حكم مصر 25 سنه و عمل منها قوه كبيره وبلد غنيه و مستقره. مصر فى عهده وصلت ذروة قوتها و غناها و سابها لابنه مملكه عظيمه مالهاش مثيل فى الدنيا وقتها.

عملات بطليموس التالت كان مكتوب عليها " لبطليموس الملك " حوالين راسه من غير اسمه المحدد. عملات مراته برينيكى مكتوب عليها " لبرينيكى الملكه " برضه من غير اسمها المحدد.

شوف كمان: لستة ملوك مصر البطلميه

Holbl, Gunther, A History of The Patolemaic Empire , Routledge, London & New York 2007, ISBN 978-0-415-23489-4

• Sharpe, Samuel, The History of Egypt Under the Ptolemies, Edward Moxon, London 1838, Kessinger Publishing's Reprints, USA 2007, ISBN 1-4325-4859-X

• اكتشاف معبد الملكة برنيكى^{[permanent dead link‍]}
• اكتشاف اطلال معبد مرات بطليموس التالت^{[permanent dead link‍]}

فيه فايلات فى تصانيف ويكيميديا كومونز عن:

بطليموس التالت