سافرت على اوروبا مع امها الملكة نازلى و اختها الاميره فايقه ، و فى الرحله دى و هما فى مارسيليا قابلت الملكة نازلى رياض غالى اللى كان بيشتغل امين للمحفوظات فى القنصليه المصريه فى مارسيليا ، فكلفته القنصليه المصريه بخدمة الملكه و الاشراف على نقل شنطها هى و الاميرات.
اتطورت العلاقه مابين الاميره فتحيه و رياض بشاى غالى المسيحى اللى كان من عيلة غالى المعروفه و لما حست امها الملكه نازلى بان العلاقه بقت علاقه عاطفيه شجعتها.
لما وصلت الأخبار دى مصر و عرف بيها الملك فاروق زعل جداً و دعا مجلس البلاط الملكى للانعقاد و اتخذ المجلس قرارات ببطلان الجواز و حرمت الملكة نازلى والاميرة فتحيه من كل الالقاب الملكيه ومصادرة كل ممتلكاتهم فى مصر . الملك فاروق هدد رياض بشاى غالى بقتله . بشاى غالى ابو رياض بشاى غالى اتقتل فى اسيوط فى 5 يناير 1953 بعد ثورة يوليو.(المصدر المصرى اليوم لايت مقتل حما الاميرة فتحية)
اتجوزت فتحيه من رياض غالى فى 10 مايو من سنة 1950 جواز مدنى بسبب اختلاف الدين فى سان فرانسيسكو فى امريكا و كان عمر الاميره فتحية وقتها 20 سنه. الملكة نازلى بقت مسيحية و الاميرة فتحية بقت مسيحية.
خلفت الاميره فتحيه من رياض غالى تلاته هما Rafik رفيق ( المولود فى 29 نوفمبر 1952)، و Rayed رايد ( 20 مايو 1954- 26 يوليه 2007 ) و Ranya رانيا ( المولوده فى 21 ابريل 1956)
أعلنت الاميره فتحيه افلاسها بعد ما خسر جوزها كل أموالها و أموال الملكه نازلى فى البورصه واتباعت مجوهرات فتحيه و نازلى فى مزاد علنى .
رفعت الاميرة فتحية دعوى للانفصال الجسدى ضد رياض غالى، وفى يوم 10 ديسمبر سنة 1976 انتهت حياتها نهاية دراميه لما طخها رياض غالى بالرصاص فقتلها، و حاول انه ينتحر بعدها طخ راسه بالمسدس لكن تم انقاذه و اتحكم عليه بالسجن لمدة 15 سنه مات سنه 1987 بعدها باحداشر سنة تقريبا.
.svg)
