They Died with Their Boots On (títol orichinal en anglés, en aragonés Morioron con as suyas botas puestas; enguerada en Aragón con o títol en castellano de Murieron con las botas puestas. Morioron con as botas puestas en aragonés) ye una cinta de western belico y biografico estausunidense, dirichida en l'anyo 1941 por Raoul Walsh seguntes un guión orichinal d'Aeneas MacKenzie, Wally Kline y Lenore J. Coffee y producida por Hal B. Wallis y Robert Fellows ta la productora Warner Bros. Pictures. Con una dirección de fotografía de Bert Glennon y una Banda Sonora Orichinal de Max Steiner (cal destacar-ne la inclusión d'a canción Garryowen, una chiga irlandesa que yera la favorita d'o cheneral Custer), en l'elenco d'a cinta se puet trobar a destacaus actors como Errol Flynn, Olivia de Havilland, Arthur Kennedy, Charley Grapewin, Gene Lockhart, Anthony Quinn, George P. Huntley Jr., Stanley Ridges, John Litel, Walter Hampden, Sydney Greenstreet, Regis Toomey, Hattie McDaniel, Minor Watson y Joseph Crehan. Ista cinta estió la ueitena y zaguer vegada que compartioron elenco los actors Errol Flynn y Olivia de Havilland, protagonistas masculín y femenín d'a cinta.
A cinta presenta una versión edulcorada y muit ficticia d'a vida d'o cheneral de Caballería George Armstrong Custer de l'exercito estausunidense dende la suya dentrada en l'Academia Militar de West Point dica la suya muerte en a batalla de Little Bighorn. Cal parar cuenta de que lo rodache d'a cinta s'escaició en l'anyo 1941, estando enguerada en Nueva York o 21 de noviembre, poquez días antes de l'ataque a Pearl Harbor o 7 d'aviento, que precipitó la dentrada d'Estaus Unius en a Segunda Guerra Mundial, y la sociedat estausunidense amenistaba tener herois en ixos momentos de dificultaz. Asinas, se presenta en a cinta la situación que conduz a la batalla final como una baralla entre politicos corruptos d'una man y l'heroico cheneral Custer d'atra, con os indios como sufridors d'as maquinacions d'os politicos corruptos de Washington. Tanimientres, seguntes o guionista y historiador Alex von Tunzelmann:[1]
Entre las muitas incorreccions y incoherencias d'a cinta, Alex von Tunzelmann destaca que qui anunció que s'heba descubierto oro en as Black Hills y ubrió la puerta ta lo lurte de buscadors que provocó la revuelta d'os lakotas y la guerra estió chustament o cheneral George Armstrong Custer.[1]
Como en cualsiquier cinta tenyida d'heroísmo (y lo chenero d'o western no en ye una excepción) s'amenista un heroi, que en ista cinta no puet estar so que o cheneral George Armstrong Custer interpretau por Errol Flynn; pero tamién s'amenista un antiheroi, que (y ista ye una d'as novedaz d'a cinta) no ye pas l'indio, a qui s'amuestra en a cinta con bella benevolencia, so que os politicos corruptos encarnaus dende lo principio d'a cinta por o papel de Ned Sharp, interpretau por Arthur Kennedy.[2] Ned Sharp representa lo contrapunto d'orden frent d'as tendencias anarquicas de Custer y, d'atra man, representa tamién a importancia d'os diners, d'o comercio y d'o capitalismo frent a la importancia que Custer li atorga a la gloria.[2]
Argumento
George Armstrong Custer plega en l'Academia Militar de West Point con un extravagant uniforme inspirau en l'uniforme de Joachim Murat que él mesmo heba disenyau y acompanyau d'o suyo canelerio, estando confundiu por os sentinelas con un cheneral. Dende lo primer momento Custer amuestra poco intrés por a disciplina militar pero destaca por as suyas cualidaz como chinete de Caballería, estando lo zaguero d'a suya clase de cadetz cuan se produz la batalla de Fort Sumter y emprencipia la Guerra Civil Estausunidense. Lo Gubierno d'Abraham Lincoln decide incorporar a l'exercito estausunidense la mayor cantidat posible de cadez como oficials debant d'a necesidat imperiosa de reunir tropas ta luitar contra la sublevación d'os Estaus Confederaus d'America y la mayor parte d'a clase de Custer marcha enta los suyos destins, pero Custer ye arrestau como gosa escayecer.
alavez plega en l'Academia de visita con su pai la choven Libbie Bacon, qui s'enamora d'o choven cadet, que li corresponde, pero lo claman ta incorporar-se ascape a las filas de l'exercito y marcha sin responder a la invitación que li heba feito Libbie ta que la visitase de tardada. En plegar en Washington, DC Custer precura sin guaire exito obtener un destín de mando de tropas, pero lo mantienen en aspera dica que casualment troba en un restaurant a lo tenient cheneral Winfield Scott, chefe de l'exercito estausunidense, qui li consigue un destín en una unidat de Caballería a on fa una acción heroica que li comporta una medalla, una ferida de guerra y un permiso, que aproveita ta visitar la suya ciudat natal, Monroe, a on tamién i vive Libbie. Sindembargo, encara que tien una carta de presentación escrita por un cheneral amigo d'o pai de Libbie, un malentendiu fa que iste se niegue a recibir-lo.
Tanimientres, por una error burocratica, bien luego se troba nombrau cheneral d'a Brigada de Michigan, una unidat de Caballería formada por cuatre rechimientos. L'actuación de Custer con succesivas cargas de caballería d'os rechimientos d'a Brigada (1º de Michigan, 5eno de Michigan, 6eno de Michigan y 7eno de Michigan) en a batalla de Gettysburg ye decisiva ta frenar l'abance d'a caballería de l'exercito confederau de J. E. B. Stuart que menazaba la ciudat de Washington, la capital.
Dende alavez, Custer manda con a-saber-lo d'exito unidaz d'a Caballería estausunidense mientres la guerra, dica que remata y torna en a suya ciudat natal, a on finalment fa la voda con Libbie. Bien luego se cansa d'a vida civil, y prencipia a tener problemas d'alcoholismo y la suya muller pide aduya a lo cheneral Scott, qui troba un destín ta Custer en o territorio de Dakota mandando lo 7eno de Caballería en Fort Lincoln. Cuan Custer i plega en o suyo destín, troba que lo rechimiento ye una colla de zorrizos indisciplinaus que amenista lo liderazgo d'un chefe riguroso. Qui fomenta l'alcoholismo d'a tropa y amás vende armas a lo indios ye Ned Sharp, que ya heba estau enemigo de Custer mientres que yeran cadez en l'Academia Militar de West Point. Custer troba una ferramienta ta fomentar l'esprito de cuerpo d'as tropas en una canción que li heba ensenyau un britanico, Garryowen. Lo 7eno de Caballería bien luego gana una mereixida fama por a suya disciplina, y contiene a los colonos que quieren dentrar en o territorio indio ilegalment, vulnerando los tractaus entre los indios y lo Gubierno estausunidense.
Pero Ned Sharp y lo suyopai manipulan ta lograr la destitución de Custer, que marcha enta Washington ta denunciar-ie la corrupción reinant. Mientres la suya ausencia, se revocan la suyas órdenes y se fomenta la invasión por buscadors d'oro d'os territorios indios de Black Hills y esclata una guerra contra los lakotas que defienden las suyas tierras. Finalment, Custer consigue que lo President d'os Estaus Unius Ulysses S. Grant li permita de tornar en Fort Lincoln y recuperar lo mando d'o rechimiento, marchando heroicament a luitar contra los indios, morindo él y la mayor parte d'o rechimiento en a batalla de de Little Bighorn.
Producción
Sobre un guión orichinal, la cinta se concibió dende un primer momento ta estar protagonizada por Errol Flynn y asinas l'anunció la productora Warner Bros. en chinero de 1941,[3] pero lo rodache no prencipio dica que l'actor remató la filmación d'unatra cinta que yera interpretando, Dive Bomber.[4]
O rodache, por limitacions de presupuesto, se fació en una zona rural a lo canto d'a ciudat de Los Angeles y no pas en os escenarios reals d'os escaicimientos, como yera la intención orichinal. Mientres lo rodache morioron tres personas: la primera por una cayida d'o caballo, en crevando-se lo cuello, la segunda en tener un infarto de miocardio, y la tercera, empalau por una espada que portaba mientres una carga de caballería en cayer tamnién d'o suyo caballo. L'actor Jim Thorpe (que no amanixe en os títols de credito d'a cinta) tenió una baralla con Errol Flynn mientres lo rodache, noquiando-lo.[5]
En ista cinta nomás que un amerindio amanixe con un papel individualizau, Crazy Horse, estando amás l'actor Anthony Quinn un d'os actors d'a cinta con oríchens amerindios; antiparte, ta representar a los nativos americanos en a cinta s'esleyó nomás que a 16 nativos sioux, estando los atros papels interpretaus por filipins.[5]
Ta la Banda Sonora Orichinal d'a cinta, Max Steiner adaptó una chiga tradicional de musica irlandesa, Garryowen, que yera la canción favorita d'o cheneral Custer. Tanimientres en a trama d'a cinta se presenta como una canción que li ensenya un oficial que proveniba de l'exercito britanico. La productora fació servir partes recicladas d'a banda sonora de They Died with Their Boots On ta las cintas Silver River y Rocky Mountain, dos cintas de western posteriors protagonizadas por Errol Flynn.
Se veiga tamién
Referencias
- ↑ 1,0 1,1 (en) Alex von Tunzelmann: They Died With Their Boots On: overdressed, overblown and so over, en The Guardian, 11 de febrero de 2009.
- ↑ 2,0 2,1 (fr) Pierre-Simon Gutman: "La charge fantastique" de Raoul Walsh, en L’Avant-Scène Cinéma, numero 676, octubre de 2020.
- ↑ (en) Warner Bros. Stories Listed: Million Dollars Worth of Plots on Hand for Films to Be Made in 1941, en Los Angeles Times, 3 de chinero de 1941, p. 10.
- ↑ (en) "Dive Bomber" Is Next Vehicle Of Errol Flynn, en The New York Times, 15 de febrero de 1941, p. 9.
- ↑ 5,0 5,1 (en) Trivia de They Died with Their Boots On en Internet Movie Database.
- ↑ (en) They Died with Their Boots On en Internet Movie Database.
Vinclos externos
