The Last Samurai (títol orichinal en anglés, en aragonés O zaguer samurai, enguerada en Aragón con o títol traduciu enta lo castellano de El último samurai) ye una cinta coproducida entre lo cine estausunidense, lo cine chaponés y lo cine neozelandés l'anyo 2003. Ye una cinta de cine belico y d'aventuras dirichida por Edward Zwick seguntes un guión adaptau por John Logan, Edward Zwick y Marshall Herskovitz basau en una historia d'o mesmo John Logan, con una dirección de fotografía de John Toll, una banda sonora orichinal de Hans Zimmer y una producción cinematografica de Marshall Herskovitz, Edward Zwick, Tom Cruise, Paula Wagner, Scott Kroopf y Tom Engelman ta las productoras Radar Pictures, The Bedford Falls Company y Cruise/Wagner Productions, y l'elenco d'actors principals lo composan Tom Cruise, Timothy Spall, Ken Watanabe, Billy Connolly, Tony Goldwyn, Hiroyuki Sanada y Koyuki.
The Last Samurai conta la historia de Nathan Algren, un antigo capitán d'o 7eno Rechimiento de Caballería de George Armstrong Custer traumatizau y alcolizau por a suya experiencia en as degollizas a on partecipó y que treballa en un circo dica que li ufren d'entrenar a las tropas d'o nuevo exercito chaponés seguntes tecnicas occidentals ta luitar contra la rebelión de Satsuma de samurais descontentos con o nuevo Gubierno chaponés dimpués d'a restauración Meichi. Se tracta d'una cinta ambientada en l'anyo 1877 en California, Kyoto y atros puestos de Chapón y filmada en Kyoto, Himeji (prefectura de Hyōgo) en Chapón y en Nueva Zelanda, amás d'en California en os Estaus Unius. A cinta recibió cuantos premios y nominacions, incuyindo-ie cuatro nominacions a los Premios Oscar en a suya 76ena edición y tres nominacions a los Premios Globos d'Oro en a suya 61ena edición.
Se veiga tamién
Referencias
Vinclos externos
