- Iste ye un articlo sobre una cinta estausunidense de cine de suspenso de 1991; ta atros usos, se veiga Sleeping with the Enemy (desambigación).
Sleeping with the Enemy (títol orichinal en anglés, en aragonés Dormindo con l'enemigo; enguerada en Aragón con o títol en castellano de Durmiendo con su enemigo, Dormindo con o suyo enemigo en aragonés) ye una cinta de cine d'intriga psicolochico neo-noir dramatico de cine estausunidense de l'anyo 1991 dirichida por Joseph Ruben seguntes un guión adaptau por Ronald Bass basau en Sleeping with the Enemy, una novela de Nancy Price publicada en 1987. La Banda Sonora Orichinal ye obra de Jerry Goldsmith y la dirección de fotografía un treballo de John Lindley. Participan en a cinta, entre d'atros, os actors Julia Roberts, Patrick Bergin, Kevin Anderson y Elizabeth Lawrence.
A cinta s'ambienta en os anyos 1990 en Iowa y Massachusetts y se filmó en os estaus de Carolina d'o Norte y Carolina d'o Sud. S'engueró en os cines d'Estaus Unius l'8 de febrero de 1991, en recebindo criticas negativas. Tanimientres, tenió prou exito de publico, en recaudar 175 millons de dólars frent d'os 19 millons que teneba de presupuesto. Antiparte, batió lo récord de recaudo ta una cinta con protagonista principal femenina en o suyo primer cabo de semana, con un recaudo de 13 millons de dólars, superando lo récord que dica l'inte teneba Aliens, con 10 millons.
Argumento
Laura Burney ye una muller con una vida aparentment idilica con un matrimonio perfecto con Martin, un exitoso asesor d'inversions de Boston y vive en una polida casa chunto a la mar. Tanimientres, dezaga d'o exterior atractivo y escantador de Martin se troba en realidat una personalidat obsesiva y controladora que abusa fisicament, emocional y sexual de Laura mientres las cuatro anyadas que han pasau dende la suya voda; y dimpués d'abusar-ne, la banya y la cubre con flors y regalos.
Bel día Martin accepta la invitación d'un d'os suyos vecins, un medico, ta navegar una nueit con o suyo barco, encara que sabe que Laura tien acuafobia, ye decir, que li fa cera l'augua. Mientres a navegación nocturna esclata una tronada y Martin y o medico luitan ta mantener o barco a flote. Laura desaparixe en a mar dimpués d'una ola, aparentment incapable de nadar. Encara que a Coast Guard rechira la mar, no troban o suyo cadavre y finalment consideran que ha muerto afogada en a mar. Martin s'amuestra desconhortau con a suya perdida.
Sindembargo, Laura no ha muerto, so que ye viva. Secretament, Laura aprendió a nadar superando la suya fobia a l'augua y planeyó finchir la suya muerte aproveitando la tronada ta fuyir d'os abusos de Martin. Nadó dica la placha debant d'a suya casa y en dentrar talló lo suyo cabello, se ponió una peluca, pilló os diners que teneba escondius y marchó enta la gara d'autobús ta dirichirse enta Cedar Falls, en Iowa. Li heba dito a Martin que Chloe, su mai, heba muerto; pero en realidat su mai, encara que con ceguera y con un derrame cerebral, ye viva y Laura l'ha levau enta una residencia en Iowa amán de Cedar Falls en preparación d'a suya propia fuchida.
En plegar en Cedar Falls, Laura refa la suya vida. Adopta un nuevo nombre, Sara Waters, loga una casa y troba un treballo. Bien luego lo suyo nuevo vecín, Ben Woodward, un profesor de teatro d'a escuela local, siente atracción por Laura y finalment tienen una cita, pero cuan preba un acercamiento fisico, Laura / Saura lo refusa y li diz que marche. Ben para cuenta que Laura amaga bel pasau problematico y finalment Laura li confiesa que heba fuyiu d'un matrimonio a on padeixeba abusos.
Casualment Martin troba en a suya casa bellas pistas que li fan sospeitar que Laura ye viva. Y ixo se confirma cuan troba en o ixauguadero l'aniello de voda de Laura, que ella heba aventau por o WC. Marcha enta l'asilo a on yera internada la mai de Laura ta prebar de trobar-ie bella pista sobre Laura pero en l'asilo li dicen que la mai no heba muerto, so que Laura la heba portau enta la suya casa con o suyo mariu. Decide contractar uns detectives y finalment troba la pista d'o nuevo asilo de Chloe. Cuan pregunta en o nuevo asilo, li dicen que un choven acaba de visitar a Chloe y Martin comprende que ixe choven ye la propia Laura. Investigando finalment troba la residencia de Laura y tamien conoix a existencia de Ben, qui mica en mica ye repuntando la suya relación con Laura. En aproveitando l'ausencia de Laura, Martin dentra en a casa y dixa pistas que fará que Laura veiga que él l'ha trobau ta que experimente terror en asperando-lo. Y finalment se presenta debant de Laura ta castigar-la por a suya fuyida.
Premios
Critica
En enguerar-se la cinta, remató con as doce semanas que portaba estando Home Alone la cinta con mas recaudo.[4] En total, recaudó 101,599.005 dólars en Estaus Unius y 73,400.000 dólars mas en o resto d'o mundo, estando asinas un exito por o suyo recaudo. En o Reino Uniu s'engueró o 12 d'abril de 1991 y en o primer cabo de semana yera en segunda posición dezaga de Highlander II: The Quickening, continando en segunda posición en o siguient cabo de semana.
Tanimientres, a critica especializada no estió tan favorable. Asinas, Roger Ebert comentaba que:[5]
Ye una cinta
slasher disfrazada, una versión de luxo d'a viella formula d'o
cine d'explotación a on la victima puet correr pero no amagar-se
En SensaCine, Eulàlia Iglesias diz que:[6]
Joseph Ruben no consigue que la cinta funcione en un rechistro amanau a las cintas d'
Alfred Hitchcock y fa por esturruzar-la enta lo campo d'o
terror, a on él se troba mas comodo
Se veiga tamién
Referencias
Vinclos externos
