Marco Aurelio (en latín Marcus Aurelius Antoninus Augustus), naixito de Roma o 26 d'abril de 121 y muerto en Sirmium u Vindobona o 17 de marzo de 180, estió un emperador de l'Imperio Romano, dende o 161 dica o 180 y un d'os principals filosofos d'o estoicismo.
Entre os anyos 161 y 169 estió coemperador con Lucio Vero, periodo en o que bi habió una guerra contra l'Imperio Parto. N'esta guerra os romanos vencioron por l'acción d'o cheneral Avidio Cassio, que plegó a saqueyar Ctesifont en l'anyo 164, pero tornoron infectaus por una pestilencia que afectó negativament a la población romana, en especial a l'exercito, que heba de defensar unas mugas muito grans. O mesmo Lucio Vero murió n'esta epidemia.
Marco Aurelio habió de dedicar os suyos esfuerzos mes grans a defensar a muga danubiana, a on se produciban continos ataques de pueblos chermanicos (marcomans y cuados sobre tot), y sarmatas (chacigues). Una incursión de chermans plegó a saqueyar Aquileya. As Guerras Marcomanicas rematoron con exito romano. Entre 170 y 180 Marco Aurelio escribió o libro Meditaciones mientres yera en ixas campanyas militars.
L'exercito romano tamién habió de luitar en atras parz de l'imperio mientres yera embrecau en as luitas contra os chermans y sarmatas. Marco Aurelio habió de ninviar a lo suyo millor cheneral Avidio Cassio pa esclafar una revuelta en Echipto.
Marco Aurelio tenió de medico bel tiempo a lo mesmo Galén. A suya salut empeyoró mientres as campanyas contra os chermans y sarmatas. Circuló a falordia que heba muerto, y ixo fació que Avidio Cassio se proclamás emperador, o que tecnicament equivaleba a una sublevación. Marco Aurelio nombró succesor a lo suyo fillo Comodo. Avidio Cassio fue executau por as suyas mesmas tropas.
