O laco Pukaki (en anglés Lake Pukaki) ye o mas gran de tres lacos alpins alto u baixo paralelos que van de norte enta sud a o largo d'o canto norte d'a compleganza d'o Mackenzie (os atros dos son o laco Ohau y o laco Tekapo), en a isla d'o Sud de Nueva Zelanda. Os tres lacos se creyoron cuan as morrenas terminals d'as cheleras que reculaban bloqueyoron as suyas respectivas vals, formando lacos de morrenas.
L'alimentación glacial d'os lacos les da una color azul distintiva, creayada por a farina glacial, que son particlas de roca a-saber-lo finas d'as cheleras. O laco Pukaki cubre una aria de 178,7 km², y a elevación de superfície d'o laco por un regular va de 518,2 a 532 m sobre o livel d'a mar.
O laco ye alimentau en o suyo extremo norte por o río Tasman, que tien a suya fuent en as cheleras Tasman y Hooker, amán d'o Mont Cook. Dende a costa sud d'o laco bi ha buenas anvistas d'a montanya, que ye a 70 km.
O laco fa agora parti d'o plan hidroelectrico Waitaki. A salida orichinal d'o laco yera en o suyo extremo sud, en o río Pukaki, pero astí s'ha construyiu una entibadera, y as canals levan augua d'o laco Pukaki y o laco Ohau a traviés d'a central electrica d'Ohau a o laco Ruataniwha. O laco Pukaki tamién ye alimentau por as auguas d'o laco Tekapo, que se desvían a traviés d'una canal a una central electrica en a costa este de Pukaki.
Vinclos externos
