La Losa (La Losilla en castellano) ye una aldeya de lo municipio d'Aras de los Olmos, en la comarca churra de Los Serrans y en la provincia de Valencia. La suya población ye de 39 habitants (2011).
Cheografía
La Losa ye a bel kilometro a lo sud de lo río Arcos y a encara menor distancia de la muga con lo termin municipal d'Arcos de las Salinas y Aragón.
Toponimia
Lo toponimo La Losa ye transparent en aragonés, castellano y catalán; La palabra "losa" se remonta a una radiz prerromana *LAUSA. Se conservó en tiempos posteriors a la castellanización de lo Reino de Valencia como La Losa (1656, 1667, 1698), La Lossa (1760). Tamién ye documentau Masada de Losa dica zaguers de lo sieglo XVII. En catalán existió como exotoponimo La Llosa (1684, 1693).
En castellano desarrolló una forma Losilla por lo menos dende 1705[1]. Esto representa un diminutivo toponimico pa diferenciar-se de Losa del Obispo[1]. Tamién existe la variant toponimica Losilla de Aras por lo menos dende 1846-1850.
Historia
Lo 18 de marzo de 1239 lo rei Chaime I d'Aragón dio termins a lo concello y villa de Teruel y menciona Lossa como una de las suyas mugas:
Sic incipit a flumine de
Guadalaviar et vadit cerro ad
turrim de La Cuba que dicitur Serriella; et sicut vadit ad
Lossam et ad sumum de Cutema; et exiit ad
la covam de Abenferruz et ad sumum de foz de Cherutea; et vadit ad fontem Sarcosa; et vadit ad sumum de portu de Bexxis de
la Salada, cum omnibus
almansis; et exit ad foxem de Bexxis; et donat per cerrum in turre de talaia de Bexxis et exit ad turrim de la coba de
Xerica et de ipsa in sursum.
En l'anyo 2001 Casanovas, Santafé y Sanz describioron una nueva especie de dinosauro sauropodo con lo nombre Losillasaurus giganteus a partir de restos trobaus en La Losa.
Referencias
