Indiana Jones and the Kingdom of the Crystal Skull (títol orichinal en anglés, en aragonés Indiana Jones y lo reino d'a calavera de cristal, enguerada en Aragón con o suyo títol traduciu enta lo castellano como Indiana Jones y el reino de la calavera de cristal) ye una cinta de cine estausunidense de cine d'aventuras d'acción enguerada l'anyo 2008, dirichida por Steven Spielberg seguntes un guión adaptau por David Koepp (basau en una historia de George Lucas y Jeff Nathanson basada a la vegada en os personaches creyaus por George Lucas y Philip Kaufman), con una banda sonora orichinal de John Williams, una dirección de fotografía de Janusz Kamiński, una producción cinematografica de Frank Marshall ta la productora cinematografica Lucasfilm Ltd. y un elenco que se composa, entre d'atros actors, de Harrison Ford, Cate Blanchett, Karen Allen, Ray Winstone, John Hurt, Jim Broadbent y Shia LaBeouf.
En 1957, un grupo d'achents sovieticos secuestran a Indiana Jones ta fer-lo servir ta trobar un extraterrestre momificau de l'incident de Roswell. Cuan consigue fuyir, conoix que un d'os suyos companyeros ha trobau una calavera de cristal en Perú a traviés d'un choven y chuntos consiguen fuyir d'os achents sovieticos, marchando enta Perú. En a tomba de Francisco de Orellana troban una calavera de cristal, y cuan los sovieticos los capturan l'informan de que son d'orichen extraterrestre y que poseyen poders especials. Tamién han capturau a Marion Ravenwood, qui informa a Indiana que lo choven que l'ha acompanyau, Mutt, ye lo suyo fillo. O grupo ha de luitar ta devolver a calavera a los suyos lechitimos propietarios y fuyir d'os sovieticos en a selva tropical peruana.
Indiana Jones and the Kingdom of the Crystal Skull ye la tercera cinta d'a franquicia cinematografica Indiana Jones, y s'ambienta en Connecticut y Nevada en os Estaus Unius y en Perú, y las suyas escenas se filmoron en a provincia de Misiones (Archentina), en Bridgeport, Essex y New Haven (Connecticut), Dos Palos, Firebaugh, Fresno, Los Angeles, Pasadena y Stockton (California), Abiquiú (Nuevo Mexico), en Hilo y atros puestos en Hawaii y en Deming y atros puestos en Nuevo Mexico en os Estaus Unius, en Paraná (Brasil), amás d'en os Downey Studios en Downey, los Paramount Studios en Los Angeles, os Universal Studios en Universal City y los Warner Brothers Burbank Studios en Burbank en California.[2]
Se tracta d'una cinta que ha recibiu bels premios y nominacions, en destacando una nominación a los Premios BAFTA (Premio BAFTA a los Millors Efectos Especials) en a suya 62ena edición.
Se veiga tamién
Referencias
Vinclos externos
