Hudhayl ben Khalaf ben Razín (muerto en 1044 u 1045) estió un miembro d'a familia Banu Razín y primer rei d'a Taifa d'Albarracín, dende alto u baixo l'anyo 1011 u 1012 dica a suya muerte.
Fillo d'un tal Khalaf ben Lubb, yera miembro d'una familia d'orichen berber Hawwara, muit arabizada, que heba dentrau a la peninsula Iberica en os primers momentos d'a conquiesta musulmana. Os Banu Razin sinyoreyavan a zona d'Albarracín tiempos antis d'a fitna.
En rematar o conflicto entre o Califa Hixam II (976-1009 y 1010–1013) y Sulayman al-Mustaín (1099-1010 y 1013–1016), refirmó a o segundo y iste le confirmó como sinyor d'os territorios que ya gubernaba. Manimenos a partir de 1013, prencipió a distanciar-se d'os problemas d'o califato y se centró en gubernar os suyos territorios d'a manera mas independient posible. No adoptó apelatius pretenciosos sino que simplament se feba decir hachib, lo que le permitiba exercer o poder de feito, sin haber d'oposar-se d'una manera frontal a la posibilidat d'o poder teorico d'un eventual califa. Levó o títol d'Izz-ad-Dawla (en arabe Fuerza d'a dinastía).
Aconsiguió un cierta prosperidat economica ta o suyo estau gracias a la suya situación, en un puesto estratechico ta o comercio d'a epoca.
O suyo reinau (mas de trenta anyos) significó una epoca de paz y floreiximiento d'as artes en o suyo chicot reino. Morió en a suya capital, Shantamariyya al-Xarq (actual Albarracín) en 1044 u 1045. Le succedió o suyo fillo Abd al-Malic ben Hudhayl.
