Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Lo suyo termin municipal ye extenso y presenta muitas prolongacions que rodeyan muitos lugars de la comarca, antigas aldeyas dependients d'Albarracín. Estas prolongacions se denominan mangas y presentan ampluras d'entre pocos metros y bels hectometros[1] Estreitas franchas de terreno de lo termin d'Albarracín deseparan de tot lo termin de bella localidat como Monterd d'Albarracín d'atros termins municipals.
Una prolongación suroccidental de lo termin d'Albarracín plega dica a Val de Cabriuel y la Vega de Tacho, cerca de la muga con la provincia de Cuenca. Tota la muga de la Sierra d'Albarracín con la provincia de Cuenca corresponde a lo termin d'Albarracín, encara que sigan estreitas franchas de terreno.
Dentro de lo lugar las suyas carreras son espingadas y estreitas. La construcción ofreixe la orichinal arquitectura popular a mas de tener a color royisca caracteristica dita rodena. Esta color la han presa casas que en primeras yeran blancas y desbinioron royencas por lo cheso local, de la formación Keuper, a on ye asociau con archilas royas que tienen oxido de fierro. Por atra parte tamién han construito con piedras d'arena roya de la formación Bundsandstein, lo tipico rodeno.
La parti antiga se divide en dos zonas:
La Ciudat con las suyas casas pendidas dencima de la foz de lo río.
El Rabal.
La zona conoixida como El Barrio no fa parti de la ciudat antiga; se troba a l'atra marguin de lo río.
En 1284 lo rei d'Aragón Pero lo Grant conquerió Albarracín en la victoria de lo Setio d'Albarracín, li concedió lo títol de Ciudat, (enantes teneba lo títol de Villa), y deseparó las aldeyas creyando la institución de la Comunidat d'Albarracín seguindo lo modelo d'atras comunidaz aragonesas. En 1297 se concede a Albarracín lo dreito a celebrar ferias.[2] Encara Albarracín y la sinyoría estioron independients atra vegada, adibindo-se ya pa cutio a lo reino d'Aragón en 1379 con Pero IV lo Cerimonioso.
Toponimia
Albarracín prene nombre de la familia Banu Razín que fundó la Taifa d'Albarracín. En textos medievals se puede veyer variants documentals como Albarracino u Albarrazino que en bel caso pueden estar hipercorreccions pa no escribir as rematanzas en -ín propias de la parla popular.
La mas gran part de la toponimia menor ye en castellano u común con lo castellano, pero destacan uns poquez microtoponimos navarro-aragoneses como Puntal de LoGalindo, (que conserva l'articlolo), Barranco de la Chiqueta y Puntal del Melguizo, u Barranco de los Terreros, (cerca d'Entramasaguas). Cerca de Bezas, pero en lo termin d'Albarracín se troban dos monts ditos Los Chermanetes u El Chermanete. Cerca de lo termin de Bezas se troba la partida de Tramasaguas, Entramasaguas u Entrambasaguas, que indica lo forcallo de lo río de la Fuent del Berro con lo río Guadalaviar.
En lo casco viello, a on que ye la Seu tenemos la Plaza de la Seo, y qui en fació lo retulo escribió como Plaza del Aseo quedando dimpués lo error pa cutio.