A Cruzada de Balbastro (tamién conoixida como Guerra de Balbastro u Setio de Balbastro) estió una expedición militar empentada por o papa Aleixandre II pa prener a os moros a ciudat de Balbastro. Bi participó un important exercito, composau por combatients que veniban de toda a cristiandat occidental. O setio d'a ciudat estió en 1063. Por o caracter internacional de l'exercito y por o refirme papal estió un preludio d'as Cruzadas en Tierra Santa.
Expedición
O papa Aleixandre II estió o primero en pedricar a Reconquiesta en 1064, presentando-la como una urchencia d'a cristiandat. Tamién fue pedricada en Borgonya, fácil que con o refirme de l'abate Hugo de Clunyego, chermano de Tomás de Chalon qui mandó un destacamento. A voluntat de participar en a cruzada s'estendilló mes luent de Francia seguntes o monche Aimé du Mont-Cassin, qui sinyala que "grant chevalerie de Francoiz et de Borguegnons et d'autre gent" yeran presents en o setio. De feito, un important exercito composau prencipalment por franceses y burgunyons, un continchent pontifical (con normandos d'Italia sobre tot) y un exercito de combatients catalans y aragoneses yeran presents en 1063 cuan encomenzó o setio.
A capeza d'o continchent papal estió o normando Guillén de Montreuil, a d'os aragoneses Sancho Remíriz d'Aragón, reino muito amenazau por os moros. O continchent mes grant yera o d'os occitans d'Aquitania condueito por Guillén VIII (u Guy-Geoffroi). S'entituló Christian generalissimo, implicando a dirección d'a expedición en conchunto. Encara que a composición de l'exercito ye encara un tema controvertiu, ye acceptau por un regular que a mayor parte yeran d'orichen norpirenenco.
O duque d'Aquitania condució o suyo exercito a traviés d'os Pireneus pasando por Somport. Este exercito s'adhibió a l'exercito catalán en Chirona a prencipios de l'anyo 1064. L'exercito completo prenió Graus, que resistió dos asaltos, y dimpués en marzo s'adrezó enta Balbastro, que alavez feba parte d'a Taifa de Leida, dirichida por al-Muzaffar.
A ciudat de Balbastro, que no podeba recibir aduya dende Leida, fue asetiada, y con l'aprovisionamento d'augua tallau, fue rapidament presa. Os cruzaus saqueyoron brutalment a ciudat y facioron mortaleras con os musulmans, (se diz que i murioron 50.000).
Consecuencias
O botín d'os cruzaus fue considerable: as cronicas mencionan a captura de muitas mullers musulmanas y tamién de muitos trasoros. A dirección d'a ciudat fue cedida a Ermengol III d'Urchel.
Os musulmans practicoron a tecnica de tierra cremada pa evitar l'abance d'os cristianos. As tropas cargadas de botín y lo duque Guy-Geofrroy, que yeran deseyosos de tornar a las suyas tierras troboron una desincusa pa fer meya vuelta.
En 1065, os moros contratacoron y reprenioron a villa, fendo una mortalera con a guarnición y desfendo o treballo d'os cruzaus.
Tibalt, qui yera a lo mando d'os burgunyons morió, fácil que como consecuencia d'as feridas sufridas mientres fuyiba dimpués que os moros reprenesen Balbastro.
Desacherata intencionalment por a Orden de Clunyego, a presa de Balbastro tenió un grant impacto en a cristiandat. Enantes d'esta batalla os caballers que luitaban contra os moros en Espanya lo feban a títol individual y yeran en a subchección d'un rei u prencipe local. A Guerra de Balbastro estió a primera vegada que un exercito travesó os Pireneus pa luitar contra os musulmans y estió un preludio d'as cruzadas.
