O convento de Sant Domingo ye un antigo convento dominico d'a ciudat de Zaragoza. O convento de Sant Domingo yera situau en a plaza d'iste nombre de Zaragoza amán d'a puerta de Sancho.
O convento fue fundau por Chaime I y en 1250 ya se treballaba en a ilesia monacal. Estió un conchunto arquitectonico impresionant, y en o suyo refectorio se reunioron en cuantas ocasions as Corz d'Aragón. Hue tasament queda mas que o debantdito refectorio, construyiu en primerías d'o sieglo XIV, y parti d'a ilesia, construyida en o sieglo XVII.
Descripción
Teneba una sumptuosa ilesia de tres naus y un superbioso retablo mayor executau en marbres y adornau con excelents obras d'escultura d'o mesmo material. Con cuatre columnas doricas en o primer cuerpo y dos en o segundo, quedaba enterament aislau. Lo mandó construyir en Chenova l'arcebispe de Valencia Isidoro d'Aliaga pa o sepulcre d'o suyo chirmán Luis, consellero d'Estau y inquisidor cheneral y habendo-se destinau pa retablo s'aconsiguió un doble obchecto pos a o piet d'o mesmo por a parti d'o coro, que se troba dezaga fue sepultau o inquisidor.
O convento en l'actualidat
De l'antigo convento nomás se conserva o refectorio, ya que a resta de l'edificio fue destruyiu mientres os setios de Zaragoza en 1809.[1]
O convento s'ha emplegau en diferents epocas como asilo municipal, escuela preparatoria militar, casa d'a ciudat de Zaragoza,[2] museu de Artes Polidas y escuelas municipals u colechio nacional d'ensenyanza cheneral basica.
Desde 1984, estió seu de l'Instituto d'Educación Segundaria "Luis Buñuel". En 2001, se fació una important reforma en o refectorio en a que se repuntó y se desmontoron bels estudiez y columnas de fundición.[3] Actualment ye a seu d'o "Centro de Documentación de l'Augua y o Medio Ambient".
Referencias
Bibliografía
Enlaces externos
