Die Noordelike Provinsie is een van Zambië se tien provinsies en, soos die naam aandui, in die noorde van die land geleë. Dit grens in die weste aan Luapula, in die noorde aan Tanzanië en die Demokratiese Republiek van die Kongo en in die suide aan die Sentrale Provinsie en aan die Oostelike Provinsie.

Die provinsie beslaan 147 106 km² en die geskatte bevolking was in 2000 1 604 388.^[1] Die hoofstad is Kasama. Die ander vername dorpe is Mpika, Isoka en Mpulungu.

Die Noordelike Provinsie se infrastruktuur vir toeriste is nog redelik swak ontwikkel, maar dit het nietemin talle nasionale parke en wildernisgebiede asook pragtige landskappe. Die gebied kry hoë reënval en het groot riviere en talle mooi watervalle wat uitloop in mere wat Europese ontdekkingsreisigers eeue lank geboei het.^[2] David Livingstone, wat onder meer in die provinsie na die oorsprong van die Nyl gesoek het, het juis hier op 1 Mei 1873 aan disenterie en malaria beswyk.^[3]