PROFILPELAJAR.COM

Carel Boshoff (III)
Carel Boshoff (III)
Gebore	Carel Willem Hendrik Boshoff; 9 November 1927; Nylstroom
Sterf	16 Maart 2011 (op 83); Orania
Nasionaliteit	Suid-Afrika
Beroep	Akademikus, politikus
Bekend vir	Stigter van Orania
Eggenoot	Anna Verwoerd
Kinders	Carel Boshoff IV

Professor Carel Willem Hendrik Boshoff (9 November 1927 - 16 Maart 2011) was die stigter van Orania en die skoonseun van die voormalige Eerste Minister van Suid-Afrika, Hendrik Verwoerd.^[1]

Biografie

Carel Willem Hendrik Boshoff is op 9 November 1927 op die plaas Doornfontein naby Nylstroom gebore.^[2] Hy was die tweede kind van Willem Sterrenberg Boshoff en Anna Maria (Annie) Boshoff.^[3] Annie was Willem se tweede vrou en Carel was een van sewe kinders. Willem en sy eerste vrou het ses kinders gehad.^[2]

Boshoff het teologie aan die Universiteit van Pretoria gestudeer en het sy BA-graad in 1948 verwerf. In 1951 het hy sy Baccalaureus Divinitatis-graad behaal en in 1961 'n meestersgraad in missiologie met die titel van sy proefskrif Streeksontwikkeling in die Sekokoro-, Mamathola- en Mametsa-gebied deur die Departement van Bantoe-Administrasie en -Ontwikkeling, sosiologies en volkekundig beoordeel.^[4]

In 1967 het hy die Departement Sending- en Godsdienswetenskap aan die Fakulteit Teologie van die UP tot stand gebring. Voor die tyd het hy in verskeie afgeleë plekke in die Transvaal sendingwerk gedoen en kon gevolglik vlot Noord-Sotho praat. Hy was ook die Sekretaris van Sendingwerk van die Nederduitse Gereformeerde Kerk in Suid-Transvaal.

Boshoff se vrou Anna, met wie hy in 1954 getroud is, is in 2007 oorlede. Sy was die dogter van dr. Hendrik en mev. Betsie Verwoerd.^[5] Van 1981 tot 1989 was Boshoff die leier van die Voortrekkerbeweging en was tot sy afsterwe 'n erelid van dié organisasie. Hy was verder ook die voorsitter van die Afrikaner Broederbond (van 1980 tot 1983) en van SABRA van 1970 tot 2007. Hy was ook leier van die Vryheidsfront Plus in die Noord-Kaap sedert 1994, totdat hy deur sy seun in die pos opgevolg is.

In 1988 was Boshoff een van die Afrikaner Vryheidstigting (AVSTIG), alhoewel hy hoofsaaklik bekend is as die stigter van Afrikanerdorp, Orania, in 1990. Dit is gestig met die doel om dit in 'n volkstaat uit te brei. Tot en met 2007 was Boshoff die president van die Orania Beweging, toe hy ook deur sy seun, Carel Boshoff IV, opgevolg is.

Boshoff is op 16 Maart 2011 op 83-jarige ouderdom aan kanker oorlede. Hy is aanvanklik met dermkanker gediagnoseer, maar dit het sowat twee weke voor sy dood na sy ander organe versprei.

Ampte

Boshoff het die volgende ampte beklee:

Posisie	Organisasie	Aangestel	Afgeloop
Voorsitter	Orania Verteenwoordigende Raad	2000	2006
Voorsitter	Orania Bestuurdienste (Edms) Bpk.	1990
Uitvoerende hoof	Afrikaner Vryheidstigting	1988
Voorsitter	Afrikaanse Gereformeerde Bond	1987
Voorsitter	Die Afrikaner Volkswag (Kultuurorganisasie)	1984	1999
Voorsitter	Die Afrikaner Broederbond	1979	1983
Stigter en voorsitter	Instituut vir Missiologiese Navorsing, UP	1979	1988
Voorsitter	SABRA	1972	1999
Lid	Raad van die Randse Onderwyskollege	1963	1979
Voorsitter	NG Kerkboekhandel	1988	1988
Lid	Provinsiale Raad, Noord-Kaap	1994	2001
Afgevaardigde	Statebondkonferensie, Australië	2000	2000
Nasionale leier	Voortrekkerbeweging	1981	1989
Dekaan	Fakulteit Teologie, UP	1978	1981
Sendeling	NG Kerk	1953	1963

Verwysings

↑ "Stigter van Orania sterf" (html) (in Engels). Nuus24. Geargiveer vanaf die oorspronklike op 20 Maart 2011. Besoek op 16 Maart 2011.
↑ ^2,0 ^2,1 "Boshoff's van Doornfontein: kort voorgeskiedenis". Geargiveer vanaf die oorspronklike (html) op 18 Oktober 2011. Besoek op 16 Maart 2011.
↑ "Carel Willem Hendrik Boshoff" (in Engels). Geargiveer vanaf die oorspronklike (html) op 20 Maart 2011. Besoek op 16 Maart 2011.
↑ "Professor Carel Boshoff" (in Engels). sahistory.org.za. Geargiveer vanaf die oorspronklike (html) op 19 April 2011. Besoek op 16 Maart 2011.
↑ "Anna Boshoff was a 'community person par excellence'" (html) (in Engels). Mail & Guardian. Geargiveer vanaf die oorspronklike op 9 Oktober 2019. Besoek op 16 Maart 2011.