PROFILPELAJAR.COM

*Aäron*
Aäron
	; Die hoëpriester Aäron; Illustrasie in die Kievan Psalter, 1397
Vereer in	Judaïsme, Christendom, Islam
Feesdag	Die Sondag voor geboorte (Sondag van die Heilige Vaders van die Ou Testament) (Oosters-Ortodokse Kerk); Maronitiese Kerk: 4 September

Aäron
Aäron
	Standbeeld van Aäron in die Dresdense Vrouekerk
Gebore	Nuwe Ryk van Egipte
Sterf	Berg Hor, Moab
Nasionaliteit	Israeliet
Bekend vir	Hoëpriester van Israel
Eggenoot	Eliseba
Kinders	Nadab, Abihu, Eleazar, Itamar
Ouer(s)	Amram en Jogebed

Aäron (Hebreeus: אַהֲרֹן, Ahärôn, helder verlig of die verligte, Arabies: هارون, Hārūn; Grieks: Ἀαρών) is 'n persoon wat in die Bybel en die Koran beskryf word. Hy was die ouer broer van Moses. Volgens Eksodus 7: 7 was hy drie jaar ouer as Moses maar jonger as Mirjam, hulle suster. Aäron het sy broer Moses gehelp om die Israeliete uit Egipte te lei. In die Hebreeuse Bybel (Ou Testament) word hy in die boek van Sjemot/Eksodus beskryf.

Aäron is met Eliseba, die dogter van Amminadab en die suster van Nagson getroud (uit die stam Juda) en hulle het saam vier seuns gehad: Nadab, Abihu, Eleasar en Itamar (Eksodus 6: 22, Numeri 3: 2, 1: 7, 2: 3, 7: 12, 10: 14, Rut 4: 20, 1 Kronieke 2: 10-11).

Moses se helper

Toe Moses as leier geroep is het God belowe, dat Aäron vir hom ´n "mond" sou wees (Eksodus 4: 16, 30) en in Egipte het Aäron as Moses se profeet opgetree (Eksodus 7: 1, 4: 16-30). Aäron het namens Moses met die farao (die koning van Egipte) gepraat, om hom te oortuig om die Israeliete vry te laat. Volgens Sjemot/Eksodus 7,1 tot 3 (die 1983-vertaling):

Maar die Here antwoord hom: “Kyk, Ek gee aan jou gesag oor die farao, en jou broer Aäron sal jou woordvoerder wees.^[1]

Alles wat Ek jou beveel, moet jy aan jou broer Aäron oordra, en hy moet dit vir die farao vertel sodat hy die Israeliete kan laat trek uit sy land uit.^[2]

Maar Ek sal die farao hardkoppig maak, sodat Ek baie tekens en wonders in Egipte kan doen.^[3]

Saam met Moses het Aäron die volk van Israel met die uittog uit Egipte (Ex 12: 31) en op die woestynreis gelei (Eksodus 16). Tydens die geveg teen Amalek het hy saam met Hur die hande van Moses ondersteun (Eksodus 17: 12). Hy het saam met Moses die berg Sinai opgeklim (Eksodus 19: 24) en later kom hy saam Moses, Nadab, Abihu en sewentig van die oudstes van Israel God aanskou (Eksodus 24: 1-11). Aäron en Hur is as Moses se plaasvervangers aangewys tydens Moses se verblyf op die berg vir veertig dae en veertig nagte (Eksodus 24: 14).

Aäron was die mindere van sy broer Moses. Hy het veral betekenis gehad weens sy priesterskap (Psalms 99: 6, 133: 2). Die priesterskap volgens die orde van Aaron is egter minder as volgens die orde van Melgisedek (Hebreërs 5: 1-6, Hebreërs 7).

Aäron se staf

Aäron se staf is 'n paar keer gebruik om die farao te oorreed om die Israeliete te laat trek.

God het Moses en Aäron in Sjemot/Eksodus 7,9 beveel: "“As die farao vir julle sê: ‘Doen bietjie 'n wonderteken,’ moet jy vir Aäron sê: Vat jou kierie en gooi dit voor die farao neer dat dit 'n groot slang word.”"^[4] Hulle is toe na die farao en Aäron het sy staf op die grond neergegooi. Volgens die Bybel het Aäron se staf werklik 'n slang geword, wat al die slange wat die farao se towenaars gemaak het opgevreet het.

Aaron se staf is ook gebruik om die Nylrivier se water in bloed te verander. Hy het "sy kierie opgelig en voor die oë van die farao en sy amptenare op die Nyl se water geslaan" en "al die water het in bloed verander. Die vis in die Nyl het gevrek en die Nyl se water het so gestink dat die Egiptenaars dit nie kon drink nie. (Sjemot/Eksodus 7,20–21)^[5]^[6]

Sien ook

Verwysings

↑ (af) "Eksodus 7,1". Bybel: Eksodus. Bybelgenootskap van Suid-Afrika. Besoek op 23 Augustus 2019. Maar die Here antwoord hom: "Kyk, Ek gee aan jou gesag oor die farao, en jou broer Aäron sal jou woordvoerder wees.
↑ (af) "Eksodus 7,2". Bybel: Eksodus. Bybelgenootskap van Suid-Afrika. Besoek op 23 Augustus 2019. Alles wat Ek jou beveel, moet jy aan jou broer Aäron oordra, en hy moet dit vir die farao vertel sodat hy die Israeliete kan laat trek uit sy land uit.
↑ (af) "Eksodus 7,3". Bybel: Eksodus. Bybelgenootskap van Suid-Afrika. Besoek op 23 Augustus 2019. Maar Ek sal die farao hardkoppig maak, sodat Ek baie tekens en wonders in Egipte kan doen.
↑ (af) "Eksodus 7,9". Bybel: Eksodus. Bybelgenootskap van Suid-Afrika. Besoek op 23 Augustus 2019. "As die farao vir julle sê: 'Doen bietjie 'n wonderteken,' moet jy vir Aäron sê: Vat jou kierie en gooi dit voor die farao neer dat dit 'n groot slang word."
↑ (af) "Eksodus 7,20". Bybel: Eksodus. Bybelgenootskap van Suid-Afrika. Besoek op 23 Augustus 2019. Toe het Moses en Aäron gedoen presies wat die Here hulle beveel het. Aäron het sy kierie opgelig en voor die oë van die farao en sy amptenare op die Nyl se water geslaan, en al die water het in bloed verander.
↑ (af) "Eksodus 7,21". Bybel: Eksodus. Bybelgenootskap van Suid-Afrika. Besoek op 23 Augustus 2019. Die vis in die Nyl het gevrek en die Nyl se water het so gestink dat die Egiptenaars dit nie kon drink nie. Oral in Egipte was daar bloed.