Andrea del Verocchio

Andrea del Verocchio
Geboortenaam Andrea di Michele di Francesco de' Cioni
Gebore ca. 1435
Florence, Italië
Sterf 1488
Venesië, Italië
Nasionaliteit Italiaans
Veld Skildery, beeldhoukuns
Beweging Renaissance
Werke Tobias en die engel
Die doop van Christus
Christus en Sint Thomas
Beïnvloed Leonardo da Vinci, Pietro Perugino, Domenico Ghirlandaio, Sandro Botticelli, Lorenzo di Credi en Michelangelo
Die doop van Christus, 1474-1475, Verrocchio en Leonardo.
Christus en Sint Thomas

Andrea del Verrocchio, gebore as Andrea di Michele di Francesco de' Cioni (± 1435 – 1488) was 'n Italiaanse beeldhouer, goudsmid en skilder wat aan die hof van Lorenzo de' Medici in Florence gewerk het. Sy studente het Leonardo da Vinci, Pietro Perugino, Domenico Ghirlandaio en Sandro Botticelli ingesluit, maar hy het ook kunstenaars soos Michelangelo beïnvloed.

Hy het in die klassieke styl van die Florentynse Vroeë Renaissance gewerk en word beskou as een van die invloedrykste kunstenaars in die oorgangstyd van die Vroeë na Hoog Renaissance.

Lewe

Verrocchio is in Florence gebore in 1435. Sy pa was Michele di Francesco Cioni wat nie met Verrocchio se ma getroud was nie. Michele het teëls en bakstene gemaak, en later het hy as belastinggaarder gewerk. Hy het vir die Medici-familie van bankiers gewerk, toe verhuis hy na Venesië.

Toe Verrocchio gebore is, is hy Andrea di Francesco di Cioni genoem. Sy naam is verander na Andrea del Verrocchio toe hy by 'n goudsmid genaamd Verrocchio (wat waarskynlik Francesco di Luca Verrocchio was, wat baie ryk en suksesvol was) sy vakleerlingskap gedoen het. As vakleerling by 'n goudsmid het Verrocchio geleer hoe om juweliersware en goue eetgerei soos borde, skottelgoed, kanne en southouers te maak. Hy het geleer hoe om goud in dun velle genaamd "blaargoud" te hamer en dit te gebruik om prentrame, standbeelde en verligte manuskripte te versier. Hy het ook geleer hoe om bronsbeelde te maak. Verrocchio se bronsbeelde is sy bekendste werke.

Op hierdie tydstip het Verrocchio Donatello ontmoet. Donatello het een van die bekendste beeldhouers ooit geword. Hy het baie meer standbeelde as Verrocchio gemaak. Donatello en Verrocchio het egter albei 'n standbeeld van Dawid met die kop van Goliat gemaak, en albei het 'n groot standbeeld van 'n bekende soldaat te perd gemaak ('n ruiterstandbeeld).

Bronne

  • Brown, David Alan (2003). Virtue and Beauty: Leonardo's Ginevra de' Benci and Renaissance Portraits of Women. Princeton University Press. ISBN 978-0691114569
  • Butterfield, Andrew (1997). The Sculptures of Andrea del Verrocchio. New Haven: Yale University Press. ISBN 9780300071948.
  • Covi, Dario A. (2005). Andrea del Verrocchio: life and work. Florence: Leo S. Olschki. ISBN 9788822254207.
  • Freiberg, Jack (2010): "Verrocchio's Putto and Medici Love". David A. Levine, & Jack Freiberg (Eds.), Medieval Renaissance Baroque: A Cat's Cradle for Marilyn Aronberg Lavin. New York: Italica Press, pp. 83–100.