אין ספר דניאל פארציילט ער די וואונדערליכע מראות וואס ער האט געזען, וואס מלאכים האבן אים געוויזן און ערקלערט איבערן צוקונפט פון אידישן פאלק, און איבער די אויפשטייג פון די וועלט גרויסמאכטן און זייערע מלחמות ביז משיח'ס טאג.
אויך פארציילט ער, צווישן אנדערע, וויאזוי מען האט אים יונגערהייט געברענגט צוזאמען מיט זיינע חברים צו דינען אין קעניגליכן פאלאץ אין בבל, די געשיכטע פון דניאל אינעם לייבן גרוב, די געשיכטע פונעם שריפט אויף דער וואנט אין פאלאץ פון בלשצר געשריבן דורך א מיסטעריעזער האנט, און ווי דניאל האט ערקלערט דאס באדייט דערפון. אויך איז דא דארט די תפילה וואס דניאל האט מתפלל געווען אז די אידן זאלן אויסגעלייזט ווערן און זיך צוריקקערן קיין ארץ ישראל.
א גרויס טייל פון ספר דניאל איז געשריבן אין אראמיש, א שפראך וואס די אידן האבן דעמאלט גענוצט.
