E Statuut pa Reino Hulandes (òf simplemente Statuut) ta regla e relashonnan konstitushonal entre Hulanda, Aruba, Kòrsou i Sint Maarten.
E Statuut a keda ehekutá dia 15 di desèmber1954, ora Reina Juliana a firma e akta di konfirmashon, dunando e paisnan di Reino un posishon igual. E ta indiká ku kada pais ta atende su asuntunan interno independientemente. Huntu e paisnan ta trata e asuntunan di reino. E Statuut ta duna ademas e reglanan pa kooperashon mutuo, asistensia, konsulta i pa e konstelashon estatal di e paisnan.
Dia 29 di desèmber 1954 proklamashon di e lei di Statuut a tuma lugá dor di gobernador Struyken den un sesion seremonial di Parlamento di Antias Hulandes. Na e okashon aki gobièrnu antiano bou di Efraïn Jonckheer a deklará e dia komo un dia di fiesta ofisial i a otorgá un pordon parsial na tur prezu na Antias Hulandes, loke a redusí nan kastigo ku 1/5 parti te un maksimo di seis luna.[1]
Kambio di e Statuut ta solamente posibel si tur pais ta aprobá esaki. E konstitushon di Hulanda ("Grondwet") i e konstitushon di Aruba, Kòrsou i Sint Maarten ("Staatsregeling") ta supordiná na e Statuut.
Rekomendashonnan
Na 2024, na okashon di e 70 aniversario di Statuut pa Reino Hulandes Raad van State (Konseho di Estado di Reino, RvS) den un konseho spontaneo a formula dos prinsipio pa futuro di Reino Hulandes: "koperashon konstruktivo i asistensia mutuo" i "kontribushon na relashonnan mas balansa i komprenshon mutuo". RvS ta rekomendá pa, a base di koperashon, enfoká riba garantisá entre otro derechonan humano, bon gobernashon i leinan di konsensus di Reino. Pa balansa e relashonnan e ta propone pa redusí e defisit demokrátiko dor di duna tur residente ku nashonalidat hulandes den paisnan di Karibe Hulandes e derecho aktivo pa vota pa Tweede Kamer. AKtualmente esaki ta konta solamente pa personanan ku a biba na Hulanda of a traha den servisio públiko pa dies aña. Habitantenan di e munisipionan spesial di Boneiru, Sint Eustatius i Saba ya tin mag di vota pa Tweede Kamer. Banda di esaki ta boga pa bin ku un diseño di un areglo pa disputanan entre e paisnan i Reino, segun palabrashon hasi na 2010 den Statuut.[2]
