Varsòvia (en polonés: Warszawa) es la capitala de Polonha e dempuèi 1999 lo capluòc del voivodat de Mazòvia. Se situa al ras de Vistula, a aperaquí 320 km de la mar Baltica e dels Carpats. Poblada per mai d'1,8 milion d'abitants (3 milions per l'aglomeracion), la capitala polonesa es tanben la pus granda vila del país e la 8ena mai granda de l'Union Europèa. Varsòvia se devesís en detz e uèit arondiments (dzielnice).
Destruita a 84 % durant la Segonda Guèrra Mondiala[1], Varsòvia coneguèt una creissença espectaculària pendent la segonda mitat del sègle XX que foguèt accelerada pel passatge a l'economia de mercat de Polonha dins los ans 1990. L’aglomeracion contunha de se transformar e de se desvolopar a un ritme sostengut : amassa maitas industrias e seissenta-sièis establiments d'ensenhament superior. Es tanben un centre artistic e cultural important, una plaça financièra e un pòl economic major en Euròpa Centrala.
