PROFILPELAJAR.COM

Simma Holt, nascuda Milner (Vegreville, Alberta, 27 de març de 1922 - 23 de genièr de 2015) foguèt una escrivana, jornalista e politiciana canadiana. Foguèt membre de la Cambra de las Comunas de Canadà de 1974 a 1979 pels liberals. En 1996, foguèt facha Membre de l'Òrdre de Canadà per encausa de son "engatjament permanent pr'amor d'assistir las personas victimas d'injustícia, persecucion e de pauretat".

Biografia

Simma Milner nasquèt en 1922 a Vegreville, una vilòta situada dins lo centre de l'estat canadian d'Alberta, dins una familha d'origina jusieva. Son paire, Louis Milner aviá emigrat d'Ucraïna e èra arribat a Canadà a l'entorn de 1900. Simma Milner estudièt a l'Universitat de Manitoba ont se diplomèt en 1944. Son temps a l'universitat li aviá donat d'experiéncia en jornalisme que per encausa de la manca d'òmes, qu'èran estat mobilizats per la guèrra, arribèt a venir la primièra redactora del jornal universitari The Manitoban e doncas tre qu'acabèt sos estudis, venguèt jornalista per The Vancouver Sun. En 1949, se maridèt amb Leon Holt, un professor de matematicas. En 1964 foguèt guerdonada amb lo Woman of the Year Award in Canadian Arts and Letters per son òbra Terror in the Name of God.

S'engatgèt puèi en politica, tre 1974, coma membre del Partit Liberal menat per Pierre Trudeau e venguèt membre del Parlament, cargue que servèt fins a 1979.

En 1976 venguèt cronicaira al Toronto Sun e mai tard, en 1986, escriguèt tanben de cronicas per l'Ottawa Sun e la revista Vancouver Business.