Intrèt en guèrra còntra lei Bizantins tre lo començament de son rèine en causa de problemas comerciaus. Venceire, impausèt un important tribut annuau a Constantinòble. Après aqueu succès, comencèt una lònga campanha d'afebliment de l'Empèri Bizantin en vista de conquistar la capitala imperiala. En 913, la menacèt dirèctament e lo patriarca acceptèt de lo coronar rèi (basileus) dei Bulgars e de lo maridar amb una filha de l'emperaire Constantin VII Porfirogènit (913-959). Pasmens, lei Bizantins refusèron aquelei condicions e, en despiech d'una importanta victòria de Simeon en 917, contunièron d'atacar lei Bulgars per lo mejan de seis aliats. Aquò permetèt a Simeon de prendre lo contraròtle de Serbia en 924. Dins aquò, foguèt durament batut per lei Croats en 926.
