Ven comte a l'atge de 15 ans, a la mòrt de son paire, e la succession pausa pas de problèma. Per apasimar la rivalitat amb Antiòquia, esposa la veusa de Tancrèd de Hauteville, Cecília de França. En 1118, a la mòrt del rei Baudoïn Ir, se reconeis vassal de son successor, lo rei Baudoïn II. L’emperaire de BizanciAlèxis Ièr Comnèn morís la meteissa annada, e los francs devon ara far fàcia a un Islam que s’organiza e cèrca de s’unificar, jos la direccion de Zengi, atabeg de Mòssol e d'Alèp. Aquel darrièr cèrca de dominar lo califat, situat a Bagdad, abans d’unificar la Siria musulmana e d’atacar los crosats, çò que daissa un respièch a aquestes darrièrs.
Una guèrra d'usura* s’installa fins a 1135, quand Zengi passa a l’ofensiva contra Antiòquia. Repren un grand nombre de vilas de la principautat, puèi envadís lo comtat de Trípol. Ponç l’espèra al Mont Pelegrin. La batalha es liurada en març de 1137 e demòra indecisa, quand Ponç es fach prisonièr per d'òmes de Zengi qu'an penetrat dins sa tenda. Liurat a l’atabeg, es immediatament executat.
